Politics-a sawrkar hmasa beihna niin sawi

Home Minister hlui Lalchamliana chuan Chief Minister Lalduhoma'n Assam Rifles-te'n an hmunhma an chhuahsanna turah Sawrkar hmasain Inremna a lo siam pui tawh pawmtlak lo anga a sawi chu sawrkar hmasa beihna a nih thu a sawi.

MNF National Core Committee Member leh Home Minister hlui Lalchamliana hian nimin khan Aizawl Press Club-ah thuthar thehdarhtute kawmin Assembly Budget Session neih mekah Chief Minister Lalduhoma'n Assam Riffles-te Aizawl khawpui laili atanga sawnchhuak tura sawrkar hmasa hunlaia hmalakna Home Department nena Memorandum of Agreement an lo siam tawh pawm tlaklo anga a sawi chu politics tha lo tak hmanga sawrkar hmasa beihna niin a sawi a, Chief Minister-in MOA hmasa ah Quarter Guard leh a chung tlang zawng zawngte Assam Rifles-in an la chang tur anga a sawi chu thu dik tawk lo a nih thu a sawi bawk.

Home Minister hlui Lalchamliana chuan kum 2019-a Mizoram sawrkarin Draft MOA a siam hnuah hmalakna chak zawkin a kal tih sawiin, MOA draft hmasa-ah Chite-a Assam Rifles Chand kahna hmun chu lo hmaih palh a nih avangin kum 2021-ah Chief Secretary hova Meeting neih-ah Chite-a Firing Range pawh AR-in an chhuahsan tur zingah telh belh leh a nih thu a sawi a, MOA hmasa chu fimkhur leh uluk taka duan a nih thu te, Assam Rifles lamin ram luah zui beisei an rawn neihte pawh Mizoram sawrkarin a remtih loh thu a sawi a. Chief Minister in Sawrkar kal tawhte thil tih tha awmlo ang maia House-a a sawi chu ching chhunzawm tawh lo se an duh tih a sawi bawk.