ZPM in Office thar hawngin VC thar te nen an inkawm

Serchhip Block ZPM chuan Inrinni khan Serchhip-a an Party Office thar hawnna leh Village Council Inthlanpui neih zawh taka ZPM atanga thlan tharte nena inkawmna hun an buatsaih.

Serchhip Block ZPM hian Serchhip Bazar-a R. Laldaihzauva Building chu Office atan luah tharin he Office thar hi an President V. Rozamliana chuan Ribbon chep chat-a hawngin a lawmna neih zui nghal a ni a, Vice President Lalchhara chuan an Office Pathian hnena hlanna hun hmangin VC thlan thar te hlanna hun a hmang nghal a, hemi hnu hian tawngtai rualna neiin hun an hmang nghal bawk.

Hemi hnu hian ZPM Serchhip Block-a Secretary Zirsangliana Chenkual chuan Village Council Inthlanpui neih zawh tak Report pein Serchhip Block huamchhunga Village Council 12 awmah ZPM-in VC 8-ah Executive Body an form thu leh VC Member 66 awmna ah ZPM atangin mi 41 thlantlin an nih thu a sawi bawk.

Heng Village Council Member atana thlan tharte nen hian inkawmna neih chhunzawm nghal a ni a, Party hruaitute leh VC member-te atangin VC inpumkhatna tha neih a ngaih thute, Party leh VC-te tha taka thawhho a tul thute sawi a ni a, VC chu tumah thliar lova miharsa zawkte tan leh khaw-tlang tana thawktu ni turte, Corrupt lova langtlang ngam a ngaih thute sawiho a ni bawk. Sawrkar Department dawr changin ruling party nih vanga thawktute chungtlak ching lo turte, hawihhawm leh nelawm taka be thin tura infuihna te sawiho a ni bawk a, khawtlang hmasawnna tura lungrual tak leh tangrual taka thawhho a tul thute sawiho a ni bawk a. Frontal Block (Thalai leh Zonu) lam atangin President ve ve-in an hmalakna report an pe bawk.