Serchhip-ah Badminton Coaching Centre hawng

Inrinni khan Serchhip-ah ‘Khello India Badminton Coaching Centre’ hawn a ni. Serchhip a ‘Khello India Badminton Coaching Centre’ hawnna hun Serchhip Indoor Stadium-a neih hi Serchhip District Badminton Association Sr. Vice President Lalnunsanga chuan kaihruaiin General Secretary Lalparmawia Chawngthu hnen atangin report ngaihthlak a ni a, he Centre-a Coach Lalnuntluanga hnen atangin Technical Report ngaihthlak a ni bawk.

Tun tuma hawn tak ‘Khello India Badminton Coaching Centre’ hi Mizoram sawrkar-a Sports & Youth Services Department in tunhnaia Badminton lama Serchhip District in hlawhtlinna a chan hrang hrangte hriaa Serchhip District-ah Badminton tih hmasawn zel nan leh Badminton khel thin naupang zawkten an hmalam hun lokal zel tur atana an lo chhawr tangkai theih tura an rawn din sak a ni a. Hetianga Centre din a nih theihna tura hma lak saktu Bialtu MLA leh Chief Minister Lalduhoma te, Sports Minister Lalnghing-lova Hmar leh Sports Department-a thawktute chungah SIDBA chuan lawmthu an sawi a ni.