Sawrkar hnathawk aikal la la te chungah inhriatthiamna a awm dawn lo tih CM in a sawi

Chief Minister Lalduhoma’n Mizoram sawrkar hnathawk tun thlenga aikal la an la awm anih chuan inhriatthiamna a awm tawh dawnlo tih sawiin, man chhuah an nih chuan anmahni leh a thawhna Officer chungah hremna lekkawh a ni dawn tih a sawi a. Office-a mihring hnathawk tur mamawhna a tlem zel thu a sawi bawk.

Nimin-a Mizoram Legislative Assembly thutkhawma zawhna leh chhanna hunah Chief Minister chuan tun dinhmunah sawrkar hnathawk aikal la an awm hriat a ni lo tih sawiin, Member-te zawh belhna, ‘Sawrkar hnathawk aikal la lo awm ru ta se hremna lekkawh a ni ang em?’ tih chu Chief Minister chuan chhangin, aikal la an lo la awm theih avangin sawrkar chuan Grace Period an siam chhunga insiamtha tura tih an ni tih a sawi a. Hemi piah lama aikal la an lo la awm hria an awm a nih chuan sawrkar hriattir tura ngenin, aikal la lui an awm chuan anmahni leh a chhawrtu Officer chungah action an la tawh ang tih a sawi a, “Hremna an tawh ang ang ah an phunnawi thei lo ang,” a ti a, hei hian Samagra Siksha hnuaia thawkte pawh a huam vek tih a sawi bawk. Chief Minister chuan damlohna thilah pawh aikal lakah inngaihnathiam theih a nih loh thu sawiin, “Mimal ang pawhin hnathawk thei lo chu hlawh kan pe ngai lo. A pawng a puia inban erawh kan tum lo. Special Voluntary Scheme kan buatsaih sak,” tiin damlohna avanga hnathawk chhunzawm thei tawh lo te chu rilru nuam taka an chawlh theihna tur ngaihtuah a nih thu a sawi bawk.

Chief Minister chuan tunlai thiamna hmanga Office hnathawh theih a tam zel avangin Office-a mihring hnathawk tur mamawhna a tlem zel thu pawh sawiin, tunlai thiamna lama hmasawnna turin sawrkarin E-Office chu a kalpui chhoh mek thu leh hmun tinah hmasawnna a awm zel thu a sawi a, sawrkar hnathawk indaihlohna pawh a sutkian beisei a ni tih a sawi a, Post ruak hnawhkhah loh tam tak leh hnathawk tur mamawhna sang pawh E-Office kalpui chhoh zel anih avangin mamawh zualpui bak an ti rih dawn lo tih sawiin, mihring thawk tur mamawhna tlem mahse hmasawnna hnathawh a chak phah sauh dawn tih a sawi a ni.

Chief Minister chuan Mizoram Law & Judicial Department-chu Directorate hran siam emaw, Branch pahniha then darh (bifurcate) tumna emaw a awm lo tih a sawi a, Hnahthial District-ah Law & Judicial Department hawng turin hmalak mek a nih thu a sawi bawk.