YMA chu Member te vanga hlu a nih thu sawi

Central YMA President Lalhmachhuana chuan YMA chu Member zawng zawngte avanga hlu a nih thu a sawi.

March 12-14, 2025 chhunga Dampa Group YMA inkhawmpui vawi 49-na Damparengpui-a neih a hmanpuina ah Central YMA President Lalhmachhuana chuan YMA hlutna chhan chu Central YMA hruaitute vang a ni lo tih sawiin, “YMA chu Pathian rinchhana din a ni a, YMA member zawng zawng avangin a hlu a ni. YMA hi Mizo zawng zawng, Kohhran pawh thliarhrang lova Political Party pawh huapzo pawl a ni a, a ropuiin kan hnam tan chuan a hlu a ni,” a ti a. “Kan unau, kan thenawm ram ten harsatna an tawk mek a, a lo tuamhlawm nasa bertu chu YMA kan ni. Zofate tan hian YMA hi a hlu hle a, a la hlu tual tual dawn a ni,” a ti bawk.

Hnamdang sumdawng chungchang sawiin Central YMA President chuan, “Aizawl khawpui chhung hi hnamdang sumdawngin min awp deuhthaw tawh a ni. Mizo thahnem takin kan hming hawhin hnamdang kan sumdawn tir a, hei hi kan hnam tan a pawi a ni. Aizawl berah sumdawnnaa min chimral chuan Mizoram hmundang pawh chak takin min la chim dawn a ni. Dan lova sumdawng an tam em em a, dan lova sumdawng kan hriat leh kan hmuh chuan YMA member te chuan lo man a, lo hnawhchhuah zel mai tur a ni,” a ti bawk.

Dampa Group YMA huamchhungah hian Branch YMA 12 awmin tun dinhmunah YMA member mipa 2563 leh Hmeichhia 1172 awmin member zawng zawng hi 3735 an ni.