Rooftop Solar Scheme kalpui dan tur sawiho a ni

Nimin khan Champhai-ah PM Surya Ghar: Muft Bijli Yojana (Rooftop Solar) Scheme atana District Level Committee chu an Chairman leh Bawrhsap Mohammad Aaquib DC Conference Hall-ah an thukhawm.

He thutkhawm ah hian Scheme kalphung inhrilhfiahna leh Scheme in a kentel hrang hrang sawihona leh hmalak zel dan turte rel a ni a. Member Secretary leh Cham-phai Power Circle-a Superintending Engineer, Er. M. Lalhmingthanga chuan Scheme chungchang a sawifiah bakah District Nodal Officer, Er. Lalremtluanga, Executive Engineer, Power Project Division chuan Scheme chungchang powerpoint presentation a pe bawk a ni.

PM Surya Ghar: Muft Bijli Yojana (Rooftop Solar) Scheme hi February ni 29, 2024 khan Sawrkar laipui chuan a tlangzarh a. India ram-chhunga chenna In vaibelchhe khat (nuai 100) a duh apiangte hnenah subsidy hmanga mahni Inchung-a Rooftop Solar System bun duh te tan dil theih tura duanchhuah leh ruahman a ni. Central Subsidy bakah Mizoram Sawrkar pawhin he Scheme hi a pawimawh zia hriain State Subsidy pek a lo remti tawh bawk a ni. PM Flagship Programme a nih angin chhungkaw harsa deuh te tan pawh Bank loan pawh awlsam taka lo pe turin Bank zawng zawngte pawh hriattir an ni tawh bawk a ni.