Wine leh Beer siam thei turin Dan siamthat tum

Mizoram sawrkar chuan Mizoram-a Zu khapna dan siam danglam hret a Mizoram thei leh thlai thar chhuah hmanga Wine leh Beer siam phalna ruahman a tum.

Thudawn danin Mizoram a Zu khapna dan hman mek, Mizoram Liqour (Prohibition) Act, 2019 chu Mizoram thei leh thlai tharchhuah hmanga Wine leh Beer siam phal tur lam hawi hian siamthat turin Assembly Secretariat-ah Amendment Bill thehlut a ni tawh a. March ni 6 khian he Dan siamthat tura rawtna hi Excise & Narcotics Minister Lalnghinglova Hmar chuan House-ah a pulut dawn nia thudawn a ni. Thudawn danin he Dan siamthatna hnuaiah hian Mizoram tharchhuah thlei zingah Grape chauh ni lo, Balhla, Lakhuihthei, Sawhthing, Dragon Fruit, Sapthei, Zobuh leh thil dang Wine leh Beer siam theihna ang chi atanga siam phalna atan Dan hi siam that tum a ni a. Mizoram thar atang chauhva siam theih tura ruahman a ni a. Hei hian Mizoram pawna Wine leh Beer siam lakluh phalna erawh a huam dawn lo a ni.

Chief Minister Lalduhoma chuan February ni 21 khan Zu khapna dan hlip turin sawrkarin hma a lak loh thu leh sawihona pawh a la awm loh thu Assembly House-ah a sawi a. Wine leh beer chungchangah Zu khapna dan, MLP Act siamthatna tur Excise & Narcotics Minister-in a ruahman thu a sawi a. Hemi chungchanga Excise & Narcotics Department lam atanga thudawn danin Mizorama thei, buh leh bal leh thlai tharchhuah atanga Wine leh Beer siamchhuah a nih theihna atan dan dinglai hi siamthat a herrem tum a ni.