Mizoram leh Assam Official te inbiakna turah thutlukna siam theih ala ni rih lo
Ramri buai chungchanga Mizoram leh Assam sawrkar Official-te March thla tawp lama inbe tura Assan sawrkar in rawtna a siam chungchangah Mizoram sawrkar chuan chhanna a la pe lo a, hei hi Mizoram sawrkar in Assembly thutkhawm a neih mek vang nia thudawn a ni.
Mizoram sawrkar-a Home Department hotute'n Akashvani Aizawl an hrilh danin nikum August ni 9-a Aizawl-a Home Minister K. Sapdanga ho Mizoram aiawhte leh Assam Border Protection & Development Minister Atul Bora kaihhruai Assam sawrkar aiawhte inbiak tuma March ni 31, 2025 hma ngeiin Guwahati-ah Minister pahnih te'n inbiakna chhunzawm se ti a thu an dah chu tihpuitlin theih a ni dawn ta lo niin a lang a. Minister pahnihte inbiak hma hian Official-te inbiak phawt hi Mizoram sawrkar chuan rawtin Assam sawrkar-ah tum thum lai rawtna hi a thlen a. He rawtna hi Assam Official te chuan tunhnai khan chhangin March thla tawp lamah State pahnih Official te inbe turin rawtna an siam a. Amaherawh chu Mizoram Assembly inkhawm kallai mek hi March ni 20-a tawp chauh tur a nih avangin hun a awm thei ang em tih an ngaihtuah mek thu an sawi a. Official-te inbe tura rawtna hi a taka chantir theih a ni dawn em tih hriat theih ala ni lo a ni.
Mizoram sawrkar hian Minister Level-a inbiak hma hian an inbiakna tur atana kawng lo sial lawk a, ram inchuh chungchang hi State pahnih Official-te'n chipchiar taka lo sawiho phawt nise tih an rawt reng a. Assam sawrkar lamin chhanna an rawn pek mai loh avangin inbiak hun a khawtlai ta niin Home Department hotute chuan an sawi.
Inbiakna hmasa berah Assam sawrkar chuan Atul Bora leh Official dangte rawn tirin khatih lai a Home Minister Lalchamliana kaihhruai Mizoram aiawhte nen August 2021 khan Aizawl-ah ramri chungchang inbiakna hmasa ber neih a ni a. Hemi hnu hian sawrkar hmasa hun lai khan Aizawl leh Guwahati-ah Minister-te hi vawi khat ve ve inbe zuiin ZPM sawrkar a lo pian hnuah nikum August thla khan Aizawlah Minister pahnih te an inbe leh a. State pahnih Chief Minister te New Delhi-ah tum hnih an inbe tawh bawk a ni.