VC Dan siamthatna tur pawm

Mizoram Legislative Assembly nimin-a thukhawm chuan The Mizoram (Village Councils) Bill, 2025 chu lungrual takin a pass.

He Bill puluttu LAD Minister C. Lalsawivunga chuan Dan thar danglam bikna tur te sawiin, heng zingah hian VC Member zingah sawrkar sum tichingpen an awm chuan VC tawp thiat lova a tisualtu Member hrem a ni dawn tih a sawi a, he Bill-ah hian dan hluia a tha lai leh la hman chhunzawm theih zawng zawngte chu sengluh a ni a, Village Council din, thiah te, a hun chhung te, Hmeichhe tana Seat hauhsak, Village Council Executive Body leh an rorel dan turte chu a ngai ang leh tlema tidanglam hretin dan thar ah hian sengluh vek a ni tih a sawi a, hei bakah hian Village Council thuneihna tam zawk pek rawt a ni a, chiang leh felfai zawkin an thuneihna te pawh ziah a ni a, Village Council inpek theih dan pawh mumal zawka siam a ni a, India danpuia Panchayat mawhphurhna zawng zawng sengluh a nih thu leh United Nations Sustainable goals 17 te tihhlawhtlinna tur pawh he dan tharah hian dah tel a ni bawk.

LAD Minister chuan Dan hmasaa Pawi Lakher Autonomous District Area tiam lovin tih thin chu he dan tharah hian Aautonomous District Council Area leh Municipal Area tiam lovin ti-a ziah a ni tawh tih a sawi a, Village Council a member awm thei zat chu Dan hmasaah chhung-kaw awm zata teh a nih laiin Dan tharah chuan mihring cheng zata teh a ni tawh dawn tih a sawi a. Hemi ang hian mihring 500 chenna ah member 3 an awm a, mihring 500 aia tamna ah Member 5 an awm dawn a, mi 1000 atanga 2000 inkarah member 7 an awm ang a, mi 2000 chunglamah Member 9 an awm ang, VC term chu kum 5 a ni dawn a, sawrkarin tul bik thilah chuan thla 12 thlengin a pawtsei thei dawn a ni.