PWD Minister in ATL Road an siam dawn thu leh sum pawh an neih tawh thu a sawi

PWD Minister Vanlalhlana chuan nimin Assembly Session-ah Aizawl - Thenzawl - Lunglei (ATL) kawng siam a nih dawn thu sawiin, “A siamna tur pawisa kan nei,” a ti.

Lunglei South bialtu MLA Lalramliana (Papuia) zawhna chhangin PWD Minister Vanlalhlana chuan, “ATL kawng hi siamthat a ni dawn a, a siamthatna tur sum kan nei a, kawng thaa siam kan tum. World Bank-in ATL kawng an laih laiin an hna a that loh avangin contractor ban an ni. Fix deposit-a pawisa dah cheng vbc. 20 vel a awm,” a ti a, Contractor-te hian court 10 velah PWD khing mah se thiam an chan loh thu a sawi a. Pawisa la turin Engineer-te an kal thu sawiin, “An um zel avangin an himna pawh a ngaihtuah awm a, ralti takin an awm a, pawisa hi an rawn hawn a ni. Fix deposit-a a tira vbc. 20 vel dah khan vbc. 80 vel a lo ni tawh. ATL kawng siamna tur a nih angin a siamna atan kan hmang dawn. A bang zawng chuan a tha thei ang berin Aizawl khawpui kawng siam kan tum,” a ti bawk.

INC Member C. Ngunlianchunga zawhna chhangin PWD Minister chuan kum 2024-2025 ah Road Maintenance Fund atan cheng vbc. 17.96 dah a nih thu sawiin, “Hmanral tawh zawng chu cheng vbc. 17.96 a ni,” a ti a. “Kawng Specification a zirin leh kawng chhiat dan a zirin kawng KM khat zela pawisa hman a danglam hle,” a ti a, hetihlai hian PWD chuan kawng KM khat zelah Rs. 49,300/- hmang turin an chhut thu a sawi bawk. PWD Minister chuan May 4, 1999-ah Road Protection & Enforcement Squad din a nih thu pawh sawiin, "A thlaktu turin Road Protection Sub-Division chu February 1, 2000 khan din a ni. Aizawl khaw chhunga Road encroachment (kawng chhuat-a rod chhut, kawng dala bungraw dah leh kawng area chhunga phalna nei lo a structure siam etc.) an awm leh awm loh an enkual thin,” a ti.

PWD Minister Vanlalhlana sawi danin, Road Protection Sub-Division hian an hmalakna thla tin report PWD (Central Circle) SE hnenah pein, Encroachment awmte senghawi a nih leh nih loh report-ah tihlan zel a ni a. Road Protection Sub-Division hi Road Prtotection Officer-in a ho a, a hnuaiah hian Road Protection Inspector leh Sub-Inspector an awm a. Road Protection Sub-Division hian tun dinhmunah chuan an thu zawm lo te laka action la a, hrem vak theihna dan a nei lo a. An tih theih ber chu ngenna a ni.