UD&PA Minister hovin hnathawh enfiah leh a ni

UD&PA Minister K. Sapdanga chuan Aizawl Smart City hnuaia hmalakna thawh lai mek hmun 8 ami a tlawh. UD&PA Minister-in Inrinni-a a tlawh te hi a satu Contractor-te kawmin uluk takin hnathawh kal mek leh hmabak la awmte a zawtfiah bawk a ni.

Minister in a tlawh High Field hi cheng vbc. 16 senga M/s Lushai Engineers te sak tur a ni a, kum 2023 February thla ah hna thawh tan a ni a, hna hi za zela 71% thawh zawh tawh niin kumin December thla hian zawhfel an inbeisei a, Multipurpose Ground-ah hian Football khelmual (73mx31m), Open Gym, naupang infiamna hmun, Cycling track, Elevated Jogging Track, Cricket practice Pitch leh lirthei dahna hmun te siam a ni ang.

Aizawl New Market, Dawrpui-a City Centre hi cheng vbc. 40.35 senga sak tur niin M/s Lushai Engineers ten October, 2022-ah hna an tan a, tunah hian za zela 59 zofel tawhin December, 2026-ah zawhfel an inbeisei a, City Centre-ah hian dawr (stall) 1102 a awm dawn a ni. Zemabawk Playground hi cheng vbc. 24.94 senga siam tur niin M/s Northeast Consultancy Firm Ltd niin November, 2022-ah hna an thawk tan a, tunah hian za zela 79 zo tawhin kumin June thla hian zawhfel an in beisei a, Phullem phahin mi 700 lenna Gallery siam a ni dawn bawk a, hei bakah hian lirthei dahna tur siam a ni bawk ang.

Zuangtui Indoor Stadium hi cheng vbc. 14.60 senga sak tur a ni a, Contractor chu F. Lalliansanga, Aizawl Venglai niin June, 2022-ah hna thawh tan a ni a, tunah hian za zela 99% zo tawhin March thla hian hawn hman tum a ni a, Badminton Court 6 awm thei tura ruahman a ni.

Durtlang Playground hi cheng vbc. 17.88 senga sak tur a ni a, Contractor chu M/s Biakliana & Sons, Mission Veng, Aizawl niin November, 2022-ah tanin 89% an zo tawh a, kumin October thla hian zawhfel hman beisei a ni.

Chaltlang Sports Multipurpose Hall hi cheng vbc. 13.52 senga sak tur a ni a, Contractor chu M/s H.Sanga & Sons, Chanmari, Aizawl niin November, 2022-ah hna thawh tan a ni a, 72% zo tawhin kumin November thla hian zawhfel an inbeisei a ni.

Chaltlang Tourist Lodge tihchangtlun hna hi cheng vbc. 18.12 senga sak tur a ni a, Contractor chu M/s Allied Concern, Dawrpui, Aizawl niin February, 2023-a hna thawh tan a ni a, hna hi 78% thawh zawh tawh niin kumin October thla hian zawhfel an inbeisei bawk.

Hlimen Playground hi cheng vbc. 6.59 senga sak tur a ni a, Contractor chu M/s Lalhming Infrastructure & Construction Pvt. Ltd. niin April, 2022 a hna thawh tan a ni a, hna hi 92% thawh zawh tawh niin kumin October thla hian zawhfel an inbeisei a ni bawk.