Sawthing fai leh tha tak hmuh an inbeisei tih sawi

Mission Foundation Movement (MFM) chuan Inrinni khan Sihphir Kawn Veng-a Rohrenga Hall-ah Iskut enkawlna atana hman tur Leitha an sem a, he hun hi Agriculture Minister PC. Vanlalruata chuan hmanpuiin Sawhthing fai leh tha tak kuthnathawktute atanga hmuh an inbeisei thu a sawi.

Leitha semna hunah hian Agriculture Minister PC. Vanlalruata chuan Sawhthing lei kawngah kuthnathawktute an la inpeih tawk lo deuh nia a lan avangin Sawhthing bal leh ningnel deuh a la awm niin a sawi a, hun lo awm leh turah thawnchhuah zahpui awm loh zawk hmuh an inbeisei tih a sawi bawk. Agriculture Minister chuan, tun dinhmunah Sawhthing chu phai lamah chuan kg ah Rs. 25 leh Rs. 30 te a nih laiin, Sawrkarin kuthnathawktute a lo tiam tawh avangin Support Price hmangin Kg-ah Rs. 50 in an laksak mek tih a sawi a, hetih rual hian a vawikhatna a nih avangin tlema lo buaichuar deuh a lo awm mai thei tih a sawi a. Sawhthing chingtute pawh an lo la inpeih loh deuh avangin Sawhthing bal leh ningnel deuh te a la awm tih sawiin, thawnchhuah zahpuiawmloh Sawhthing fai leh tha tak kuthnathawktute atanga hmuh an inbeisei tih a sawi bawk.

He hunah hian Sihphir, Lungdai leh Durtlang a Iskut chingtu chhungkaw 60 hnenah Leitha sem a ni a, he Project hi Ministry of Tribal Affairs hnuaia Support to Tribal Research Institute Fund niin, Social Welfare & Tribal Affairs Department kaltlanga thawh a ni a, Minister chuan, tun aia tama Iskut thar chhoh zel a nih chuan sawrkar chuan market fel leh System felfai takah kuthnathawktute luhpui a tum dawn tih a sawi a, sawrkar chuan thlai tharte lilamna tur hmun siam a tum a, hetiang market platform siam hunah chuan tunhmaa kuthnathawktute harsatna thin chu sutkian a nih thuai a beisei a ti bawk.