Tumkhat ah Heroin kg. 4 chuang zet Police in an man

Mizoram Police te chuan tun thla ni 14 khan Heroin Hawng 440 manin kg 4.722 zet-a tir a ni a, Mizoram-a tum khat-a Heroin an man tam ber tum nia hriat a ni.

Hemi chungchanga Mizoram Police thuchhuah in a tarlan danin March 13, 2025 zan khan Zokhawthar PS Team New Hruaikawn Road-a Mobile Patrolling te chuan Bike pathum leh Champhai Taxi pakhat chu New Hruaikawn atanga Champhai an pan laiin tidingin thu an zawt a, hetihlai hian Taxi leh Bike te hi tlanchhe thutin Police te hian an umzui nghal a. Chhuansawmlala (18), Khuangphah in a khalh Taxi leh a phurh Vanlalhriata (21), Zokhawthar te chu manin Bike pathuma chuang, puitling pali leh kumtling lo pakhat te pawh a hnuah man an ni bawk a. Thu zawhfiahna atangin heng mite hian inthurualin a huho in dan kalhin ruihhlo an tawlh ngei tih an inpuang zui ta a ni.

Police te hnena an inpuanna ah heng mi te hian Satha ip hring leh thawmhnaw ip dum chhungah ruihhlo hi dahin Taxi-ah hian an hlang tih sawiin, Police Duty an hmuh hnuah an paih niin an sawi a. n inpuanna bawhzui hian March 14, 2025 zing khan anmahni hruaiin an ruihhlo paih thlak hi zawn a ni a, Police duty-na hmun atanga km 1.5 velah Heroin hawng 440, kg 4.722 a rit hi an man a, heng ruihhlo te hi tualchhung rate-a chhutin Rs. 1,41,66,000/- hu nia chhut a ni.

Mizoram Police te chuan he thil thleng kaihhnawih ah hian mi 6 manin Zokhawthar Police Station-ah thubuai ziahluh nghal a ni a, kum tlinglo mi pakhat erawh JJB kutah hlan a ni a. He thil hi uluk taka chhui chhunzawm niin he ruihhlo tawlhruka inhnamhnawih nia hriat mi pahnih Henry Lalbiakzinga (34), Dinthar, Aizawl leh Laltluangzela (28), Zokhawthar te pawh March 15, 2025 khan man an ni bawk a, he thubuai kaihhnawih hi uluk taka chhui zui mek a ni bawk.