Minister thenkhat te an hna chanpual ti danglam

Mizoram sawrkar chuan thla thar April 1, 2025 atanga hman tan turin Mizoram sawrkar-a Minister thenkhat te hna chanpual a siksawi.

Hemi chungchanga sawrkar thuchhuah in a tarlan danin Cabinet Minister K. Sapdanga chu Department pali a enkawl zingah Disaster Management & Rehabilitation chu a enkawl zui tawh dawn lo a, Home, UD&PA leh DP&AR te a enkawl zui dawn a ni. Minister C. Lalsawivunga chuan LAD enkawl zui tawh lovin Horticulture Department a enkawl belh dawn thung a, a hma lama a enkawl District Council & Minority Affairs, Art & Culture Department leh AH & Vety te nen a enkawl zui dawn a ni.

Cabinet Minister Dr. Vanlalthlana chuan a Department enkawl lai pali enkawl zuiin Information & Public Relations Department leh Printing & Stationery te chhunfin rel a ni tawh avangin P&S hi a enkawl tel tawh dawn a. Lalrinpuii chuan Tourism Department enkawl tawh lovin Health & Family Welfare Department leh Social Welfare, Tribal Affairs, Women & Child Development Department te a enkawl zui ang.

Minister of State F. Rodingliana chuan a enkawllai Power & Electricity Department leh Commerce & Industries Department te enkawl zuiin Printing & Stationery a enkawl tawh dawn lo a. Prof. Lalnilawma chuan Horticulture enkawl tawh lovin Local Administration Department (LAD) leh Rural Development (RD) chhunfin, Rural Development & Administration Department enkawlin DM&R a enkawl thar dawn bakah PHE chu a enkawl zui dawn bawk a. Lalnghing-lova Hmar chuan a enkawl lai Labour, Employment, Skill Development & Entrepreneurship Department, Sport & Youth Services leh Excise & Narcotics bakah Tourism Department a enkawl tel tawh dawn a ni.