Mipui Health Care atana inbuatsaihna kal mek enfiah

Health Care Scheme thar – Mipui Health Care hman tawh tur kaihhnawiha Sawrkar lam inbuat-saihna hrang hrangte thlirin nimin khan Health Minister Lalrinpuii chuan Zoram Medical College & Hospital, Falkawn chu a hmunah a tlawh.

ZMC&H-ah hian General Ward, ICU, NICU, PICU leh Cabin te nen a vaiin khum 420 a awm mek a, Health Care Scheme thar hman turah hian sawrkar in thawktu tam tak pek belh tumin recruitment process a kalpui mek a, hemi avanga General Bed thar hlak 52 leh Cabin thar dang 30 bakah, ICU khum 13 leh Cardiology khum 6, NICU khum 4 thar, Dialysis khawl 10 hmanga Hospital tih changtlun anih mek dante chu a hmunah a enpui a, mamawh belh awm ang angte pawh Chief Minister nen phone kaltlanga inrawn nghalin a rang thei ang bera ngaihtuahpui a tum thu a sawi nghal a ni.

Health Minister hian Civil Hospital, Aizawl pawh chawhnu lamah a tlawh nghal a. Civil Hospital, Aizawl-a Cardiology Unit tihchangtlunna atana hmalakna leh Cardiology Ward-a Khum 11 awm mek, khum 11 thar dang dah belh a khum 22 awm thei tura buaipui mekte chu a hmunah a enpui a, Cardiology CICU thar khum 8 awmna tur, PICU khum 4 leh Pediatric HDU khum 8 te bakah Cath Lab Table 2 leh Recovery Unit khum 4 awmna siam thar tura ruahmanna leh hmalakna hrang hrangte chu a hmunah a enpui bawk a ni.

Health Minister Lalrinpuiii chuan Organ Transplant Centre ni thei tura Civil Hospital, Aizawl in license an hmuh tak chungchangah Hospital hotute thawhrimna chu fakawm a tih thu a sawi a. Mizo-ram-a Doctor te chu an thiamin an rintlak tawk tih sawiin, mipui ten tlawm zawk leh hun leh tha tam tak seng lova kan ram ngeia organ transplant kan tih ve theih ngeina turin tan la sauh sauh a, hmabak la awmte pawh chak zawka bawhzui turin Hospital-a hotute chu a chah nghal bawk a ni.