Thalai thi tam lutuk titlem tura hmalak tul ti

Chief Minister Lalduhoma chuan thalai thi tam lutuk chu titlem turin theihtawp chhuah a tul thu leh chhungkua atanga bul tan a pawimawh thu a sawi.

Aizawl-a Assembly Annexe Conference Hall-a Former Legislators’ Association of Mizoram (FLAM) General Body Meeting tunkar Ningani-a neih a hmanpuinaah he thu hi sawiin Chief Minister chuan a lo zirchian tawhah a tlangpuiin nula pakhat an thihin tlangval 7 thi zel ang vel a nih thu leh thalai leh pavalai thlan a tam hle tih a sawi a, Hmeithai la valai tak tak, eizawnna mumal nei si lo an tam thu leh heng hi theihtawp chhuaha do tlan a tul tih sawiin, a bul chu chhungkua nia a hriat thu a sawi a ni. Chief Minister chuan Mizoram-ah project hrang hrang laktlak loha chhuak a tam thu leh a hlui chu tih hleihtheih a nih tawh loh thu a sawi a. Project reng reng laktlak loha chhuak lo turin tun atanga tan lak a tul avangin sawrkarin hmasawnna hnathawh hrang hrang viltu tur, Mizoram State Project Monitoring Committee a siam thu a sawi a. Sawrkar lai atang pawhin member pakhat chauh dah a nih thu leh a bak chu party leh hmun hrang hrang leh FLAM atang ngei pawhin mi pakhat ruat tel a nih thu a sawi a ni. 

Chief Minister chuan FLAM member te chu tunlai thiamna sang tawh takah tar a ni lo tura fuihin kawng hrang hrang inveng turin a fuih a. State danga damlohna thila inenkawlna an tum sak an ni thin chunga an zin veivahna pek ni ngai lo chu tunhnaiah an zin veivahna senso pek tawh tura tih a nih thu a sawi a. Circular awm mek zawm that loh, FLAM member te an zin nikhuaa Airport leh Mizoram House inkara an thlen hlim leh an haw dawna hruai tur tih chu chak zawka kalpui a nih dawn thu a sawi bawk a ni.  

Ram hruaitu, MLA leh MP lo ni tawh te intelkhawm FLAM hi kumin 1994 a din niin kumin hi a kum 30-na a ni a, tunah hian FLAM member 117 leh Associate Member (Ex-MLA/MP te an thih hnua an aiawh an nupui te) 59, an vaiin member 176 an awm mek a ni.

Mizoram UT inthlan hmasa ber 1972-a tling mi 30 leh Nominated Member 3 te zing atangin mi pasarih (7) an la dam a, an zinga pathum ten he Meeting hi an la telpui thei a ni. Kum 2024-25 chhungin an member pathumte an boral a, chungte chu Lalzarliani Hmar w/o Biakchhunga, Pangkungi w/o H. Lalsangzuala leh Kapoor Chand Thakuri (1972 MLA nominated) te an ni.

Sawrkara an lo dil thin tawh angin Mizoram State Assembly Budget Session hnuhnung ber khan Ex-MLA te hamthatna, The Mizoram Salaries, Allowances and Pension of Members of the Legislative Assembly (Amendment) Bill, 2025 chu a pass a, an Medical facility-a an vah velna senso bill theih loh ni thin kha paih a ni.