Supply Minister in thawktute tan hun buatsaih

Supply Minister B. Lalchhanzova chuan a Department enkawla thawktute chu Sawrkar kum kal meka an hnathawh thlirletna leh kumthar lo awm tura an hmachhawp te sawihona neihpui pahin Zirtawpni tlai khan hun hlimawm tak a hmanpui.

Supply Minister chuan sawrkar kum kalta ah a enkawl Department Officer te leh thawktu dang te tawiawmna a dawn that avanga lawmthu sawiin, Land Revenue and Settlement Department chu siamthat leh remfel ngai tam tak awm a nih thu leh Department thu chai te pawh thu khirh tak tak a nih fo thu a sawi a. Heng te hi a tahtawla khawih chhoh zel a nih thu leh kum khat chhungin hna tam tham tak an thawh thu a sawi a ni.

Supply Department lam ve thung chu thu khirh pui pui awmlo mah se mitin mamawh thil khawihtu Department an nih angin thil reng reng chu tih nghal ngai, chinfel nghal ngai hlir a nih thin avangin tan mar viau ngai a nih angin a thawhpuite chu theihtawp an chhuah thin na ah lawmthu hrilhin, tan mar zel a tul thu a sawi bawk a ni. Minister chuan a thawhpuite chu kum kalta an thawh that a innghat mai lova hma sawn zel tura fuihin, tun Assembly Session a sawiselna aia fakna awka an dawn tam chu anmahni tiphurtu leh nasa zawka mipui rawng an bawlna kawnga chona petu nise a duh thu a sawi bawk a ni.