State University Bill pass

Nimin-a Mizoram Legislative Assembly thut-khawmah ‘The Mizoram State University Bill, 2025’ chu House in lungrual takin a pass.

He Bill puluttu H&TE Minister Dr. Vanlalthlana chuan NEP hnuaiah State University chu an duh vang ni lovin din a ngaih zawk avang leh zirlai zirna sang zawka seat chang lo zirlaiten zirna sang zawk an belh ve theihna turin State University chu din a tul tih a sawi a. Sawrkar hmasa khan kum 2023 August ni 16-a Bill Drafting Committee an din a, hmun danga State University an kalpui dan te ngun taka an zirchian hnuah The Mizoram State University Bill chu December ni 22, 2024-a Council of Ministers thukhawm chuan Assembly Session hmasa bera pharh turin a pawm tih a sawi a. Ram pumah State University 481 a awm mek a, Mizoram leh Nagaland chu hmarchhak State zinga State University la nei ve lo awmchhun an nih thu leh kum 2035-ah chuan Mizoram University chu Research University a nih tawh dawn avangin College nen a Affiliate theih tawh dawn lo tih a sawi a ni.

He Bill hian Mizoram State University chu state sawrkar Resource neih sa hmang tangkai tura duan a nih thu a sawi a, a hmingah ‘Mizoram State Unversity’ tih tur a ni a, a thuthmun chu Aizawl niin a thuneihna huamchin chu Mizoram pum a ni dawn a, Chancellor atan Chief Minister niin Pro-Chancellor-ah Higher and Technical Minister a ni dawn bawk a, state sawrkar hnuaia College te chu University Constituent College tih vek a ni dawn bawk a ni.

H&TE Minister chuan Lunglei, Champhai leh VC thenkhat atangin an ram chhunga State University din tura ngenna an dawn thu sawiin, “An ngenna zahawm mah se, kan dinhmunin a tlin rih ngang loh avangin Aizawl-ah i din phawt ang tiin thutlukna siam a ni,” tiin College awmsa pawhkhawm hmanga din tur a nih thu a sawi bawk.