Eptu MLA ten Bana Kaih hnuaia cheng vbc. 350 dah chu a tawk zo-ah an ngai lo tih an sawi

Mizoram tana kum 2025-2026 sum ruahman ah Bana Kaih hnuaia sawrkar in cheng vbc. 350 a dah chuan kuthnathawktute mamawh zualpui a chhawk theih an ringlo tih eptu MLA ten an sawi.

Nimin a Assembly thutkhawm-a Budget pharh tak chungchangah Opposition Leader Lalchhandama Ralte chuan Akashvani zawhna chhangin, Finance Minister Lalduhoma'n Mizoram budget a pharh zawh hnu lawkah nidang ang lo taka Bill putluh a nih avangin Budget chu an la zirchiang hman lo tih sawiin, Budget-a ruahmanna an siamte chu a tha nge tha lo tih an la sawi thei rih lo tih a sawi a, Bana Kaih hnuaia cheng vbc. 350 dah chu beitham hlea a hriat thu a sawi a ni.

BJP MLA Dr. K. Beichhua pawhin nimin a Mizoram Budget chu an pharh chauh a, zirchianna a la awm loh avangin sawi theih a la nei lo tih a sawi a, hetihrual hian Bana Kaih hnuaia cheng vbc. 350 dah chu ho tham a tih thu a sawi a, Chief Minister Lalduhoma'n Year of Consolidation an hman chhungin leiba a tlakhniam thu a sawi a, GSDP percent zawngin tlahniam mahse a dik zawk an hmang tawh ti-a a sawi chu thil chiang tak a ni lova a hriat thu a sawi bawk a ni.

Congress MLA Ngunlianchunga pawhin Mizoram Budget chu a kawm bak an la hmuh loh avangin ngaihdan a nei rih lo tih a sawi a, Bana Kaih hnuaia cheng vbc. 350 dah chu engmah tham lo ni-a a hriat thu leh a hminga an dah ve mai mai ang a tih thu a sawi bawk a ni.