Serchhip-ah World TB Day hmangin TB Free Village 9 te hnenah lawmman hlan an ni

Nimin March 24, 2025 khan 'World TB Day 2025' chu hmun hrang hrangah hman leh niin Serchhip-ah pawh Agriculture Minister PC. Vanlalruata hovin he ni pual hian hun hman a ni a, TB natna vei mekte enkawlna tura ei leh in tur pe thin te hnenah chawimawina hlan a ni bawk.
Serchhip Bawrhsap Pisapui Hall-a 'World TB Day 2025' puala hun hman ah hian khuallian Agriculture Minister PC. Vanlalruata chuan Ngawr tia sawi thin TB natna hi tunhma lamin kan pi leh pu te chuan natna tihbaiawm, tihdam theihloha an ngaih avangin an hlau em em thu leh a vei te pawh an tih thin thu a sawi a. Tunlai khawvel ah erawh damdawi tha tak a awm tawh thu leh India sawrkar pawhin chak takin TB natna dolet hna thawkin, kum 5 lo kal leh turah phei chuan TB hi India ram atanga umbo an inbeisei tawh thu a sawi a. TB dona leh TB natna veite enkawlna kawngah pawh tangrual zel turin mipuite a sawm bawk a ni. Minister chuan TB natna vei ten ei leh in tha an dawn theihna atana sum leh paia tanpuitu, Nikshay Mitra Donor-a tang theuh turin kalkhawmte a sawm a, amah ngei pawh Donor a nih mek thu leh Serchhip District ah pawh Donor nih leh a tum thu a sawi a. Mizo society chu inpawh tlang tak leh inkawmngeih kan nih angin natna do kawngah tangrual zel turin mipuite a sawm nghal bawk a ni.

Kumin-a 'World TB Day' ah hian thupui atan 'Yes we can end TB: Commit, Invest, Deliver' tih chu hman niin he ni puala hun hman hi Bawrhsap Paul L. Khuma chuan a kaihruai a, Serchhip District TB Officer Dr. Lallawmkimi Chhakchhuak chuan ‘100 Days TB Campaign’ an kalpui nihphung leh an hmalakna te a sawi a. December ni 9, 2024-ah khan Serchhip, Aizawl, Champhai leh Mamit District-ah te hawn a nih thu sawiin, he Campaign hian ni 100 a awh thu a sawi a. Serchhip District-ah hian khua zawng zawng tuamchhuakin, TB hrik pai endik tur an target mi 9863 chu khumin mi 11094 an endik tawh thu a sawi a. TB Statistic 2025-a a lan danin Serchhip District-ah TB vei mi 41 an awm a, Mizoram puma TB vei zat hi 437 an ni.

Nikshay Mitra Donors programme hnuaiah TB natna vei mek ten eitur tha an hmuh theihna tura sponsor tute hnenah Citation sem a ni a. TB Free Village 9 te hnenah lawmman sem a ni bawk a. Hmuntha khua chu kum hnih (2) a zawna TB Free Village an nih theih avangin Silver an dawng a. Bungtlang, Lungpho, Ngentiang, Lungkawlh, Sailulak, Leng, Khumtung leh Serchhip Field Veng te chu a vawikhatna atan TB Free Village a puan an nih avangin Bronze an dawng bawk a ni.

Nimin-a he hun hmanna ah hian TB natna laka damna lo chang tawh Lalramnghaka Kawlni, Serchhip hnen atanga thusawi tngaihthlak a ni a. Sr. CMO Dr. LP. Malsawma, Addl. DC Lalrinzuala, Serchhip District a Head of Office hrang hrang te leh mipui thahnem tak an tel a ni.