Mizoram-a Sawhthing lei chu a thawh hnihna ah Support Price base a kalpui tum a ni
Agriculture Minister PC. Vanlalruata hovin nimin khan Serchhip DC Meeting Hall-ah Serchhip District Agriculture Marketing Committee (DAMC) chu an thukhawm a, he hunah hian Agriculture Minister chuan thlai thar Market System mumal tak Mizoram-ah kalpui chhoh tumin sawrkar chuan hma a la tih sawiin, bul an la tan chauh avangin fel lo leh tihsual palh a awm lo thei lo tih a sawi a, amaherawhchu kuthnathawktute tana theihtawp chhuaha ke pen zel an tum thu a sawi a. A bultanna ah famkim vek thei lo mah se kumthar lamah chuan hei aia felfai zawka an kalpui theih a beisei thu a sawi a. Kumin February ni 20 atangin sawrkar chuan Sawhthing a lei tan thu leh a thawh hnihna ah chuan Support Price base-a kalpui tum a nih thu a sawi bawk.
Agriculture Minister chuan Serchhip DAMC hmalakna fakin District titha ber te zingah an tel thu a sawi a. Sawrkar hnathawkte hahzia a hriatpui thu leh loneitute tana thawk an nih inhria a, thahnemngai taka thawk chhunzawm zel turin a fuih a. SCC te pawh anmahni ke-a an din theih thuai an beisei thu a sawi a, sawkar hnathawk te chu anmahni chan bik SCC te uluk taka kaihruai chhunzawm zel turin a sawm a ni.
He thutkhawm hi Serchhip DAMC Chairman leh Bawrhsap Paul L. Khuma chuan kai-hruaiin Serchhip DAMC chuan an harsatna tawh hrang hrang te Minister hnenah hian an thlen a. Auction kalphung chungchanga rawtna thar an neih te, sawrkar hnathawk Co-ordinator a ruat te chungchang te leh thawktute inrelbawlna chung-chang te Minister hnenah an thlen a ni.
Serchhip District-ah hian Secondary Collection Centre (SCC) pasarih awmin, Sawhthing quintal 3302 hralhchhuah tawh a ni a. 1st installment a sum hmuh cheng vbc. 2.625 chu loneitute Banl account-ah thun fel a ni tawh a. 2nd installment hi thun leh mek niin loneitute account fel lo tlem awm te chinfel a ni a, nimin lamah thun kim hman beisei a ni.
Comments
Post a Comment