Serchhip-ah Sponsorship Scheme Programme hnuaia tanpuina pek kalphung inzirtirna neih a ni

Serchhip District Sponsorship and Foster Care Approval Committee in kum 2024-2025 chhunga Mission Vatsalya (Child Protection Service) hnuaia tanpuina (sponsorship) dawng tura naupang an thlanchhuah nu leh pa te tan nimin khan Serchhip DC Conference Hall-ah Sensitization Programme neih a ni.
District Child Protection Unit, Serchhip buatsaih 'Sensitization Programme for parents of children covered under Sponsorship Scheme Programme' hi Serchhip Addl. DC Lalrinzuala chuan khuallian nia hmanpuiin, tuna naupang kan tih te hi kan ram leh hnam tana mi pawimawh an nih avangin nakin zelah kan ram leh hnam tana tha an thawh theihna turin an nu leh pa leh pi leh pu ten kan kaihhruai a tul thu a sawi a. Naupangte thanlenna atan nu leh pa, anmahni enkawltute an pawimawh ber thu sawiin, kan hmangaihna leh an hmakhua kan ngaihna hian an hmalam hunah kawngro a su ber tih a sawi. Engemaw avanga harsatna an neihah sawrkar atangin tanpuina te pek niin tangkai taka hman theih ni mah se a tawp thlenga pawimawh ber chu an tana kan inpekna, kan hmangaihna a ni tih a sawi a. Bible chuan naupangte chu an kalna awm kawngah zirtir tur leh chu chu an upat hnu thleng pawha an thlah loh tur thu min zirtir angin tuna kan tu leh fa te kan zirtirna hian nghawng thui tak a nei dawn tih hriain, hun tha kan neih lai hian naupangte enkawlna leh rilru hrisel an neih theihna turin theihtawp chhuaha tan kan lak a tul thu a sawi a ni.

He hun hi DCPU Serchhip-a Protection Officer Protection Officer (Non-Institutional Care) Vanlalmuanpuii chuan kaihruaiin District Child Protection Officer (DCPO) Lalsiampuii chuan Sponsorship Scheme Programme an kalpui dan tlangpui a sawifiah a. Naupangte chu chhan chi hrang hrang avanga venhim ngai an nih avangin an tan Dan tha tak siam a nih thu a sawi a, he Dan hian naupangte chu chhungkua ah thanglian se a duh laiin nu leh pa tam takin kan fate hi chhan hrang hrang avangin Home-ah dah te an duh thin a, hei vang hian heng mite tanpuina atan he ruahmanna hi kalpui a nih thu a sawi a ni.

Serchhip DCPO chuan kumin sawrkar kum ah hian Serchhip District chhunga khaw hrang hrang atangin naupang 110 te chu sponsorship dawng tura thlan an nih thu leh thla tin tanpuina hi Rs. 4000/- zel pek an nih dawn thu te, kumin April atanga September thla thleng atan Rs. 24,000/- theuh an Bank account kaltlanga pek an nih tawh thu leh heng te hi naupang te ei leh in, zirna leh damdawi man bakah an thanlenna atana an mamawh leina tura pek an ni tih hre reng turin he huna kalkhawm nu leh pa te chu a chah a ni.

Nimin-a he hun hman ah hian Child Welfare Committee (CWC) atang pawhin thusawi ngaihthlak a ni a, kumin a Sponsorship dawng tura thlan naupangte leh an nu leh pa mi thahnem tak an tel a ni.