Zofate inpumkhatna tizualtu a nih CM in a beisei

Chief Minister Lalduhoma’n kumin-a Chapchar Kut chu Zofate inpumkhatna tizualtu a nih ngei a beisei thu sawiin, khawvel hmuha Mizo hnam ziarang leh ropui tak phochhuahna hun anih ngei a beisei tih a sawi.

    Chief Minister hian Social Media kaltlanga thuchhuah a siam ah kumin a Chapchar Kut chu Zofa hmun hrang hranga awm te ropui taka hmang turin a sawm a, Chapchar Kut thupui ‘Hawihhawmna’ chu Mizo hnam ziarang ropui tak, khawtlang nun leh inlaichinna ah bet tlat a ni a, he Kut hmang hian he ze ropui tak hi chawisana a awm theih nan mi zawng zawng tel turin a sawm a ni. Art and Culture Department bultumin kumin Chapchar Kut hi Aizawl bakah District Headquarter zawng zawngah leh rampawna Mizoram House-ah hman a ni dawn a, thupui atan ‘Hawihhawmna’ tih hman a ni dawn a ni. Chapchar Kut hmanna atan hian Mizoram sawrkar chuan kum kal mek budget-ah cheng nuai 100 a dah a ni.