Mizoram Assembly thutkhawm chhunzawm a ni

Mizoram Legislative Assembly pakuana thutkhawm vawi 4-na, Budget Session ni bawk chu nimin chawhma dar 10:30 khan Aizawl-a Assembly House-ah chhunzawm a ni a, nimin-a thutkhawm ah hian zawhna leh chhanna hun hman niin, Bill pathum pharh a ni a, Report leh Paper thenkhat House-ah pharh a ni bawk.

Nimin-a Assembly thutkhawmah hian Higher & Technical Education Minister Dr. Vanlalthlana chuan ‘Mizoram State Higher Education Council Rules, 2024’ chu House ah a pharh a, Social Welfare Minister Lalrinpuii chuan Report pahnih, ‘Annual Report of the Office of the State Commissioner for Persons with Disabilities, Mizoram for the year 2022-2023 and 2023-2024’ leh ‘The Annual Reports of Mizoram State Commission for Protection of Child Rights (MSCPCR) for the year 2023-2024’ te a pharh bawk.

Heng bakah hian Chief Minister Lalduhoma'n a putluh, State GST lak dan siam thatna, ‘The Mizoram Goods and Services Tax (First Amendment) Bill, 2025’ chu sawiho lovin pawm a ni a. LESDE Minister Lalnghinglova Hmar in ‘The Mizoram Youth Commission Bill, 2025’ a putluh chu Member ten an sawiho hnuah pawm a ni bawk a. LESDE Minister Lalnghinglova Hmar putluh tho, ‘The Mizoram Private Placement Agencies (Regulation) Bill, 2025’ pawh sawiho a nih hnuah House chuan a pawmpui bawk a ni.