Kawng siam dan kalphung thar hman a ni tawh

Chief Minister Lalduhoma chuan a kaihhruai sawrkar a pian hnuah kawng siam dan kalphung thar an hman tawh thu Assembly House a hrilh.

Nimin-a Assembly Inkhawm ah INC Member C. Ngunlianchunga zawhna kal zelah Chief Minister chuan, “Kawng siam danah kalphung thar kan hmang tawh a, Bituminous Concrete System kan hmang tawh a ni. Tin, Paver kal theihna chin zawng zawng Paver hmangin kawng kan siam tan tawh a, a tlo bik tawh dawn. Paver khawl a kal theih lohna ah chuan kalphung hlui System-a kal rih a la ngai dawn,” a ti a. Mizoram chhunga kawng siam zawng zawng Rigid Pavement-a siam tawh Ministry of Road Transport & Highways (MoRTH) hnenah an dil thu sawiin, “Min chhan dan a positive viauin kan hria,” tiin phal sak an nih chuan Rigid Pavement veka kawng siam a nih tawh tur thu a sawi a ni.

Chief Minister chuan Rigid Pavement hmanga kawng siam chu a man to deuh mah se a tlo bik tih sawiin, “Kum 10, kum 15 mai ni lo, kum 20 te a daih a, khuarei atan a tha a ni. Chutihrualin, Estimate awm tawh sa erawh kan ti thei dawn lo. Min phal sak a nih chuan kawng siam thar tur, estimate awm sa ni lo te chu Rigid Pavement hmanga siam zel tawh tur a ni ang,” a ti bawk.

BRO kuta pek sa kawng engemaw zat a awm tih sawiin Chief Minister Lalduhoma chuan, “Pek belh leh a tul chuan en ang a, pek belh ang, tha kan tih chuan. Mahse, tuna kan harsatna chu Land Acquisition a ni a, kan BRO-te'n hna an thawk thei lo. Home Secretary lokalte nen pawh kan sawi a, an ngai pawimawh hle,” tiin hemi chungchang ah hian Court-ah an inkhin mek thu leh Central nge State dan hman turah an buai mek thu a sawi. Chief Minister sawi danin, dan hman turah Court-ah inkhin buai avangin hna tan theih a la ni loa, a chinfelna tur tun Session-ah PWD Minister-in a pulut dawn a, BRO-te pawhin hna an tan thei tura ngaih a ni tih a sawi bawk.