Police-in kuminah kuhva ip 18,130 an man tawh

Home Minister K. Sapdanga chuan dan lova kuhva rah tawlh tihtawp tumin sawrkarin hma a lak reng thu nimin Assembly Session-ah sawiin, “Sawrkar kum kal mek (2024-2025) chhungin kuhva rah tawlh ip 18,130 man a ni tawh,” a ti.

Nimin-a Assembly Inkhawm ah MNF Member H. Lalzirliana zawhna chhangin Home Minister K. Sapdanga chuan, “Mizoram sawrkar hian Myanmar kuhva rah dan lova phurh hi tihtawp tumin theihtawp a chhuah reng a, tun dinhmunah chuan a la tawp hmak rih lo. Mizoram hmun hrang hrangah dan loa khuhva phurten kawng ruk an neihte chhui a ni a, heng kawnga kalte lo danchah theihna turin Check Gate hmun hrang hrangah dah a ni,” a ti a, kuhva man apiangte leh a neitute laka dan anga hmalak a nih theih nan Custom Preventive Force-ah hlan zel a nih thu House a hrilh.

Home Minister K. Sapdanga chuan District Magistrate-te'n an huamchhungah dan lova kuhva tawlh a awm lohna turin Prohibitory Order an chhuah tih sawiin, “International boundary vengtu Central Force-te nen tangrualin kuhva tawlhruk theihnate uluk taka ven reng a ni. Dan lova kuhva tawlhrukte hi man tur an la awm. Sawrkar hmasain kuhva rah phur lo check na atana Police Checkgate a dah belhte kha Zamuang, Mamit District-a mi tih loh chu a la awm reng e,” tiin “Checkgate hi Sailiamkawn (Serchhip District), Tuifar (Aizawl - Sairang kawng), Dapchhuah (Mamit District) leh Tuisenphai (Khawzawl District) a ni,” a ti bawk.

Home Minister-in House a hrilh danin, dan lova kuhva ro lo luhna hmun 28 a sawite chu dangchat turin Mizoram sawrkar chuan theihtawp a chhuah reng a. Mizoram Police-te'n kum 2024-2025 chhungin kuihva ip 18,130 (kg. 12,79,628) an man tawh a, hei hi cheng vbc. 23.99 man vel a ni.