Eptu Member te tel lovin 'The Mizoram Youth Commission Bill, 2025' House in a pawm

Nimin-a Assembly Session-ah Labour, Employment Skill Development & Entrepreneurship (LESD&E) Minister Lalnghinglova Hmar putluh 'The Mizoram Youth Commission Bill, 2025' chu pass a ni a, Opposition Member-te'n an pass pui thei lo thung.

LESD&E Minister sawi danin, 'The Mizoram Youth Commission Bill, 2025' hi mumal zawk, chak zawk leh langtlang zawka Mizoram Youth Commission thuam chakna tur a ni a. House Leader Lalduhoma chuan MYC Act chu kum 2008-a MNF Sawrkarin an siam a nih thu sawiin, “An siam laia an thinlung niawm tak a hriat theih. Dan hi siam ila, thawktu lak kawngah erawh dan leh hrai engmah awm lo a kan duh duh lak a, duh duh huna ban theih turin engmahin min phuar lo turin dan hi siam ang an ti ni phawt tur a ni a. Sum leh pai lah duh duh anga sawhkawi theih turin audit pawh ti lo ang an ti. Chutiang thinlung atanga he dan hi lo piang chhuak a ni. A pawi ngawih ngawih,” a ti.

House Leader thusawi lai hian Leader of Opposition Lalchhandama Ralte lo ding chhuakin, “He House zahawmna hi vawn hram hram tha ka ti khawp mai. Kha Bill kan sawi lai ngeiin House Leader hi a tel ve. Khatiang ang rilru kha tuman an sawi loh a ni a, a lo kim lo chu amend-in a kal tel tur a ni,” tiin House Leader-in thusawi chu a dem thu a sawi a. Lalduhoma chuan, “Thil tha lo chu kan sawm ngam tur a ni a, kan siamtha ngam bawk tur a ni. He dan hi rei fe hman a nih tawh hnuah Congress Sawrkarin kum 2015-ah an siamtha a, a tha lo lai an siamtha miah lo, MNF thinlung tawmin. He dan tha lo hi siamthat ngaiin Vawiin thlengin a awm phah, siamthat kan tum pawh an la ui em em leh nghal a ni,” a ti a. “Kalphung thara kal kan ni a, dan tha lo kan siamtha zel dawn. Kum 16 chhung lo ngawihbopui ang kha kan ni ve lo. Kan ram siamthat dawn chuan a nihna tak sawi a ngai. Dan tha lo kan tihte chu kan siamtha zel dawn,” a ti a ni.

INC Member C. Ngunlianchunga chuan, “Congress Sawrkarin emaw, MNF-in siam duh lo anga House Leader-in a sawi hi House-a record-a dah pawh a nalh lo ang. Amend hi a sual kan ti lo, a kim lo lai dah belh pawh kan pawm. Repeal-a paih kha enge a ngaihna. Dan hlui 70% a rawn chhawp leh tho si,” tiin member kal tawhte chungchanga House Leader thusawi dan tha a tih loh thu a sawi bawk.

LESD&E Minister-in a khaikhawm hnuah Leader of Opposition chuan House Leader-in ram hruaitu hmasate diriam taka a tih avangin a veilama thu (opposition) ho chuan an pass pui theih loh thu Speaker hrilhin, House an chhuahsan a. House Leader Lalduhoma chuan, “Eng dan pawh, Audit tel loa pawisa hman theihna dan leh hnathawktu tur Rules tel loa lak theihna dan siamtute kan dem turah ka ngai. Chuvangin a siamthatna tur dan siamthat a ni,” a ti bawk.