MNF in ‘Mizo National Day’ champha Aizawl-ah an hmang

MNF Party chuan March 1-a ‘Mizo National Day’ an hman thin pualin nimin khan Aizawl-a Mizo Hnam Run-ah hun an hmang a, he hunah hian Zalenna suala Martar te sunna hun an hmang bawk a ni.

Mizo National Day vawi 58-na puala hun hman ah hian MNF President Zoramthanga chuan MNF ten Zalenna puang a India an kah chhan chu, 'Ni 26 November, 1949-a India siamna Constitution of India Preamble-ah Mizo te kan tel ve loh avang leh Excluded area kan nih avanga India a kan tel vena tur chuan kan aiawh ten kan ngaihdan leh duhdan sawive duh kan nei,' ti-a October 30, 1965-a Laldenga leh India President Lal Bahadur Shastri, khatih laia Assam CM Chaliha telna ngeia Guahaty-a sawihona bawhzui kawngah kawng dang min hawisan a, Sipai tha chakna hmanga hnehchhuh leh awp beh luih min tumna chhanna atan loh theih lohin kan ram leh kan hnam humhim nan India chu kap ta an ni tih a sawi a. Buaina karah vawi tam inbiakna awmin kum 1986-ah remna sual chhuah alo ni ta tih a sawi bawk.

MNF President chuan, “Pathian leh kan Ram tan ral kan do a, kan bei zel a, Art. 371G kan nei ta a, Mizoram sawrkar kutah kan sakhaw humhimna pawh awm ta in, kan Lalpa leh a Ram tan kan ram chu buatsaih turin Lalpan min hruai lut ta a ni,” a ti a. “Political Party dang 35 chuang zet an ral tawh laiin kan thuthlung 'Pathian leh kan Ram tan' tih kan vawn tlat avangin Vawiin thlengin kum 64 chhung humhim kan ni a, Zoram a Party lian ber zingah min la din tir reng a ni,” a ti bawk.

Aizawl-a Mizo National Day champha hmanna hun hi MNF Sr. Vice President Dr. R. Lalthangliana chuan kaihruaiin MNF innghahna Bible chang, Sam 20:7 sawirual a ni a. MNF ticket-a Village Council leh Local Council Member thlantharte hmelhriattirna hun hman a ni bawk.