Olympic 2036-a Mizo an tel theih nan hma la zel

Sports & Youth Services changtu Minister Lalnghinglova Hmar chuan ‘Bana Kaih – Empowering Mizoram Sports’ hnuaiah kum 2036-a India-in Olympics a thlen turah Mizo infiammite tel ve theihna turin theihtawp an chhuah tih House a hrilh.

    Nimin-a Mizoram Assembly thutkhawma zawhna leh chhanna hunah Sports Minister chuan Bana Kaih – Empowering Mizoram Sports hnuaiah kum 2036-a India-in Summer Olympics a thlen turah Mizo infiammite tel ve theihna tur chu an buaipui ber a ni tih a sawi a, tunah hian theihtawp an chhuah mek tih sawiin, kum 8 atanga kum 15 inkar training pekna tura duan a nih thu leh Mizoram khaw tin atanga dil theih a nih thu a sawi a, infiamna lar lam ni lovin Medal dawn theihna tur infiamna lam insawrbing dawn tih a sawi a ni. He hmalakna hi Public-Private Partnership (PPP Mode) a kalpui tur a nih thu Sports Minister chuan sawiin, Bana Kaih hnuaiah cheng vbc. 2.50 an dawng tawh tih a sawi a, Coach tuaihriamna kalpui turin phailam nen an indawr mek a, infiamna thuamhnaw leh hmanraw tha hmang thei turin Mizoram sawrkar in hma a la mek tih a sawi bawk.