Mizoram in Electric bill ba a neih loh thu sawi

Power & Electricity Minister F. Rodingliana chuan tun dinhmunah sawrkarin eng chhit man bill ba a nei lo tih sawiin, sawrkar hmasa ba zawng zawng pawh an pe tla vek tawh tih a sawi.

Nimin a Assembly rorel inkhawmah P&E Minister chuan eng chhit man bill vbc. 200 dawn ba chu an rul vek tawh tih sawiin, tun dinhmunah leiba an rulh that avanga pawisa hmuh let cheng vbc. 2.06 dawn an nei tawh tih House a hrilh a. Kawl-phetha chungchanga sawrkar hmalakna te tarlangin, Tuirini Hydel Project pawmpuina an hmuh tawh thu leh an khuap thei a nih chuan Megawatt 24 a nih dawn thu leh cheng vbc. 676.79 a ni dawn tih a sawi a, sum chungchang ah pawh New Development Bank te nen New Delhi-ah an inhmukhawm tawh tih sawiin, sawrkar laipui lam pawhin an phur pui thu leh reilote ah a chhanna phuisui zawk an dawn a beisei tih a sawi bawk.

Minister chuan tun dinhmuna Mizoram in kawlphehtha a intodelh theihna tura sawrkar hmalakna dang sawiin, Tuivai HEP (210 MW) chu DPR ennawn mek a nih bakah Lungleng bula mi Tlawng HEP (120 MW) chu DPR siam mek a ni tih a sawi a, kumin chhunga zawh beisei a nih thu a sawi bawk.

P&E Minister chuan Serlui ‘B’ HEP thuamtha turin Study Team ten thawmthat a ngaih dan an zirchiang tawh tih sawiin, siamthat ngai lian zual siamtha turin hun leh tha bakah cheng vbc tam tak a ngai dawn tih a sawi a, sawrkar sum dinhmunin a zir loh avangin a theih angin hma an la mek tih sawiin, Megawatt tam vak lo in an kalpui mek tih a sawi a ni.