National Science Day 2025 lawmna neiin Innovator ten an thil siamchhuah an phochhuak
Mizoram Science, Technology & Innovation Council (MISTIC) buatsaihin National Science Day 2025 lawmna chu nimin khan Aizawl-a Synod Conference Centre-ah neih a ni a, Mizoram University-a Registrar Prof. Lalnundanga chuan khuallian niin a hmanpui a ni.
National Science Day 2025 lawmna hunah hian Prof. Lalnundanga chuan zirlaite kalkhawmte fuihin, Science chu Subject har tak ni lovin uluk leh taima taka zir ngai a nih zawk thu a sawi a. Keimahni theuha thiamna leh remhriatna te ngaihtuah chhuak thiam tura in zir tura fuihin, India sawrkar hnuaiah zirlaite puihna Scheme hrang hrang a tam thu leh hmang tangkaia bawhzui turin zirlai kalkhawmte chu a hrilh a. Zirtirtu lo kalte pawh zirlaite tana remchanna siamsaka, hamthatna hrang hrangte haichhuahpui turin a chah bawk. Hei bakah hian MISTIC ten zirlaite Science-a an tui chhoh zel nana an hmalakna te chhunzawm zel turin a fuih a ni.Nimin-a he hun hman hi Chief Scientific Officer leh MISTIC-a Member Secretary Er. H. Lalsawmliana chuan kaihruaiin Senior Scientific Officer leh Coordinator Dr. Davy Lalruatliana chuan National Science Day denchhena programme hrang hrang Mizorama neih dan a tarlang a. India ram pumah National Science Day puala programme hi hman mek niin kumin atangin hemi puala programme hrang hrang neih chu India State tinah in ang veka duan a nih thu a sawi a, a lawmna hun pui ber chu Vigyan Bhawan, New Delhi-ah neih niin, Prime Minister Narendra Modi-a’n a hmanpui a ni.
He hunah hian Dr. Lalchhandami Tochhawng, Scientific Officer hnen atangin he ni thupui ‘Empowering Indian Youth for Global Leadership in Science & Innovation for Vikshit Bharat’ tih hmangin thusawi ngaihthlak a ni a, National Science Day puala intihsiakna hrang hrang : 3rd State Level Science Competition te, Poster Making Competition te leh Video Making Competition lawmman sem niin National Science Day lawmna pual hian Exhibition buatsaih a ni bawk a, Mizo thalai Innovator ten an thil siamchhuahte phochhuakin kalkhawmte tan sawifiahna leh sawihona te neih a ni bawk.