MZP ten kumin-ah Zoram Ni an hmang

Kum 1966 March ni 5-a Bomb hmanga Mizoram beih champha-phak, 'Zoram Ni' chu nimin khan Mizo Zirlai Pawl (MZP) chuan hmang lehin Aizawl-a he ni puala hun hman chu Rajya Sabha MP K. Vanlalvena chuan a hmanpui a ni.

Kumin-a Zoram Ni-ah hian thupui atan ‘Tho la ding ta che’ tih hman niin Dawrpui Multipurpose Hall-a he hun hmanpuitu Rajya Sabha MP K. Vanlalvena chuan India Independence Movement-ah Mizote kan tel loh avangin India Danpui-ah Mizote himna tur a awm loh thu leh hei vang hian Mizo Independence Movement a lo piang tih a sawi a. Mizo ten kum 1966-a zalenna a puan hi Jet Fighter meuh hmanga hmehhmih tum a ni chuan he Movement nep loh zia a ti lang tih a sawi bawk. Rajya Sabha MP chuan Mizo Independence Movement hi hlawhtling chiah lo mahse, Mizote himna tur hi chiang takin India Danpui-ah tarlan a ni ta tih sawiin, “Kan ram leh kan Sakhua humhim hi kan mawhphurhna a ni. Tunhnaiah kan unau; Manipur, Burma leh Bangladesh atanga rawn raltlante ngaih theih lohna leh hmuhsitna sawi a tam hle a. Hetiang mite hi a tlangpuiin Vai Nationalism-in a chhumhminte an ni tlangpui a. Tunah keini him angin lang mah ila, engtik ni-ah emaw chuan kan unau, tuna kan mikhualte hi kan la belh hun a la thleng lo ang tih a sawi theih loh. Chuvangin, chapo thei kan ni lo,” a ti bawk.

He hunah hian MZP President H. Lalthianghlima chuan, “Zoram Ni atang hian hnam hmangaihna nei thar ila. Kan hnam tawrhna atangin hmalam i pan ang u,” tiin kum 1966 khan Mizo ten zalenna famkim nei turin hma kan lak thu leh India kan nih loh hlauin Jet Fighter meuh hmangin min bei niin a sawi a. “Kan ram kan intodelh hmaa min enkawl hi Central India mawhphurhna a ni. Mizoram ram ralmuang kan ni chunga; Enforcement Directorate (ED) leh National Investigation Agency (NIA) te kan ramah an rawn sapatal thil hi pawi kan ti hle a. Mizoram-ah duh duha an rawn tal zel a nih chuan, MZP in nasa takin kan la dodal hun a awm ang,” a ti bawk.

Zoram Ni puala hun hman hi MZP Vice President C. Lalremruata chuan kaihruaiin MZP General Secretary Chinkhanmanga Thomte chuan Zoram Ni hman a nih chhoh dan tarlangin, kum 2008 atangin MZP-in Zoram Ni hi an hman tan thu a sawi a. He ni thupui hmang hian thusawi ngaihthlak a ni bawk.

MZP Hqrs. Lunglei pawhin Zoram Ni pual hian Lunglei-a MZP Pisa-ah hun an hmang bawk a, he hunah hian an pawl Adviser Lalpeksanga Chenkual chu Resource Person atan hmangin bomb hmanga Mizoram beih ni; Zoram Ni-ah hian MZP chuan Political Party inchirhthehna leh Party hamthatna lak tumna turin tumahin hmang lo se a duh thu a sawi bawk.