Assembly thutkhawm ah Dan siamthatna tur pawm

Nimin-a Assembly Session-ah Parliamentary Affairs Minister Vanlalhlana putluh 'The Mizo-ram (Pension for Members of the Defunct Mizo District Council and of the Pawi - Lakher Regional Council) (Amendment) Bill, 2025 chu lungrual taka pawm a ni.

Bill puluttu Parliamentary Affairs Minister chuan Dan tihdanglam tur a putluh tihdanglam hnuhnun ber chu kum sarih liamta ah a nih thu sawiin, “February 2025 ang chuan District Council thiah tak pahniha MDC ni thin pension la mek mi pariat leh MDC chhungte pension la (family pension) 35 an awm a ni,” tiin MDC pariatte pension hlawh atan hian thla tin cheng nuai 2.38 leh Family Pension atan thla tin cheng nuai 4.49 sen thin a ni tih a sawi a. MDC pension-te hian thla khatah Rs. 20,000 lain, kumtin 5% in a pung a, Rs. 35,000 aia sang a la thei lo thung. Family pension chu thla khatah 10,000 niin, kumtin 5% in a pung a, Rs. 20,000 a pelh erawh a rem lo a ni.

He Dan siamthatna tur nimin-a putluh ang chuan MDC pension-te hlawh hi thla khatah Rs. 40,000 niin, kumtin 5% in a pung ang a, Rs. 70,000 a pelh erawh a rem lothung a. An hlawh pangngai bakah thla tin Medical Assistant Rs. 2,000 an dawng ang. Family pension chu thla tin Rs. 20,000 a ni tawh dawn a, kumtin 5% in a pung ang a, Rs. 35,000 a pelh erawh a rem lo a. Family pension-ah chuan Medical Assistant a tel lo a ni.