MNF OB ten thutkhawm nei

MNF General Hqrs. a Office Bearers te chu nimin khan Aizawl-a Mizo Hnam Run-ah an thukhawm.

Nimin-a thutkhawm hi MNF President Zoramthanga chuan kaihruaiin VC/LC Election 2025 neih zawh tak thlirletna leh Party hmalak zel dan tur hrang hrangte sawiho a ni a, he huna kalkhawmte chuan Resolution 6 pass in “Village Council leh Local Council inthlan kan neih zawh taka MNF-in seat thahnem tak kan la thei chu lawmawm kan ti a. Opposition party ni chunga LC/VC inthlan kan hmachhawna kan result chu lawmawm kan ti a, MNF Candidate te ring tawka thlangtlingtu Zoram mipuite chungah lawmthu kan sawi tak meuh a ni. MNF VC/LC zawng zawngte pawh kan mawhphurhna thahnem ngai taka hlenchhuak turin kan beisei a ni,” an ti.

Hei bakah hian Assembly Budget Session 2025-2026 neih meka MNF MLA-te chet dan an chhuangin an inbuatsaihna a tha an tih thu sawiin, Ram leh hnam tana tha tur huai taka an dinpui ngam thin leh sawrkar kalsual tur an venna kawnga an chet dan a chhuanawm an tih thu an sawi a. “Assembly Session neih meka Chief Minister, House Leader ni bawk rorelna hmuna a khawsak dan chu ram hotupa ber tih atan mawi lo tam tak a awm thin hi pawi kan ti takzet a. House a chhanglet tur awm ve lo, Hruaitu hmasa te sawisel thanhnan a, mite thatna reng reng hmu thei lo leh hmu thiam lo CM kan nei hi a pawi kan tiin vanduaithlak kan ti takzet a ni,” an ti.

MNF Party chuan Kohhran leh Tlawmngai pawl te duh loh, khawtlang leh chhungkua tam tak tichhetu anih avanga Zu khap burna Dan (The Mizoram Liquor (Prohibition) Act, 2019) kan neih mek chu siam danglam a, Zu thlah zalenna hmahruai atan Wine leh Beer thlah zalen a lo ni tur chu pawi an ti takzet tih an sawi a, “Ualau taka mi thenkhat te lei theih tura Zu dawr a siam tur hi tha kan ti lo,” an ti bawk.