Electric hman man tihsan rawt a ni lo

Kum 2025-2026 sawrkar kum lo kal turah Mizoram-a Electric hman man tihsan rawtna siam ni lovin mamawh zat hmuh tlin lohna chu sawrkar in Subsidy in a hnawhkhat dawn a ni.

Mizoram Electricity Regulatory Commission (MZERC) chuan Power & Electricity Department-in Financial Yeay 2025-26 atana Electric hman man (Electric tariff) thar chungchanga a rawtna kaihhnawih ah nimin khan Aijal Club-ah Public Hearing an buatsaih a, he hunah hian hun bituk chhunga rawtna leh sawiselna thu thlente bakah P&E Department-in an chhanna te ngaihthlak a ni a. Hemi chungchanga sawrkar thuchhuah tarlan danin kum 2023-2024 leh 2024-2025 ah te khan Electric hman man hi tihsan a ni tawh lova, tuna P&E Department-in rawtna a thehluhah pawh hian electric hman man hrang hrangte hi tihsan rawtna siam a ni lova, mipui atanga Revenue mamawh zat (ARR) a hmuh tlin lohna chu Sawrkar-chuan subsidy-in a hnawh khat zawk mai dawn a ni.

Multi-Year Tariff Regulations, 2014-in a phut angin Power & Electricity Department chuan kumtin in mipui hnena Kawlphetha pekchhuah nana sum leh pai a mamawh dan, Aggregate Revenue Requirement (ARR) leh Electric hman man bithliah (electric tariff) chungchanga a rawtna te chu Commission-ah a thehlut thin a. Heng rawtnate hi chanchinbu hrang hrangah chhuah niin, mipui vantlang (Consumers leh Stakeholders)-te hnen atangin sawiselna thlen duh emaw, thurawn pe duhte tan hun hawn thin a ni. Kumin hian rawtna thlen mimal pahnih an awm a, heng rawtna leh zirchianna hrang hrang behchhanin Commission (MZERC) chuan kum 2025-26 atana Sawrkar pek tur subsidy leh Electric hman man hi a bithliah thar leh dawn a ni.