Mizoram Assembly in GST siamthatna Bill an pawm

Mizoram Legislative Assembly chuan The Mizoram Goods and Services Tax (First Amendment) Bill, 2025 chu nimin khan House in lungrual takin an pass.

Bill chungchang sawihona ah hian Chief Minister Lalduhoma chuan The Mizoram Goods and Services Tax (First Amendment) Bill, 2025 chu sawrkar laipui zulzuia siamthat ve zel a ngaih avangin Amendment Bill chu putluh a ni tih a sawi a, GST Rules chu Central sawrkar lam thu a nih angin an siamthat rualin State sawrkar ten chumi dung zuia an lo siamthat ve zel a tul tih sawiin, tun tuma Amendment Bill a putluh pawh hi The Good and Services Tax Council thutkhawm vawi 56-na a an rel a nih thu a sawi a, Dan siamthat ngai an hmu hnem hle tih sawiin, GST Act leh Rules chu a taka hman a nih hnuah a tlachawpa thil lo thleng tawn tur a tam avangin tun tumah pawh siamthat ngai 40 dawn a awm avangin a mal te te a sawi sen a ni lo tih a sawi.

Leader of Opposition Lalchhandama Ralte chuan Bill chu dan anga an pawm ve a ngaih avangin a thlawp thu a sawi a, hetihrual hian paper-ah First Amendment Bill, 2025 tih leh Third Amendment Bill tiin a inziak ve ve tih sawiin, Indian Constitution Amendment zat an chhiar chhunzawm zel angin GST bik chu kumtin an siamthat ruala an Amendment zat in chhunzawm tir zel theih nise a duh tih a sawi bawk.