Mizoram District 7 chu ODF Plus (Model) an ni tawh

Zonuna Kawlni (LENKAWL) • March 4, 2025 • Comments • Mizoram

Nikum December 31 thleng khan Mizoram a District 7 chu ODF Plus (Model) an ni tawh.

Nimin khan Apex Committee of State Water and Sanitation Mission (SWSM) chu an Chairman leh Chief Secretary Khilli Ram Meena hovin CS Conference Hall, Aizawl-ah an thukhawm a, Annual Implementation Plan (AIP) atan hian cheng nuai 2549 chuang ruahman a ni. He huna tarlan a nih danin Mizoram District 11 zingah December ni 31, 2024 thleng khan District 7 chu ODF Plus (Model) ni tawhin, kumin March thla tawpah hi chuan District 8 neih beisei a ni a. Kum 2025-26 Plan atan hian a bak District 3 chu ODF Plus (Model) an nih beisei a ni.

Hetiang bawk hian Mizoram-a khaw 637 hnuaiah 569 chu ODF Plus (Model) ni tawhin, kumin March thla ah khaw 51 a pung leh tura beisei a ni a; AIP-ah hian khaw 17 dah a ni bawk. Heng bakah hian hmalakna tur hrang hrang zingah vantlang ek In atana Soak Pit siam te, tuihawk sawngbawl te, bawlhhlawh khawn-khawmna leh paih leh sawngbawlna leh a dang hrang hrangte a tel a ni. He thutkhawm ah hian Department hrang hranga Secretary leh an aiawhte an tel a ni.