Adolescence Education Programme training neih rel

Serchhip District chhunga zirna In-a thawktute tana Adolescence Education Programme (AEP) chungchang zirhona neih dan tur chu nimin khan Serchhip District Bawrhsap Paul L. Khuma hovin Serchhip DC Meeting Hall-ah sawiho a ni a, he training neih hun tur leh neihna hmun turte ruahman niin Serchhip District chhunga AEP la neih lohna School 26 te chungchang pawh sawiho a ni a, heng School-ah te hian Adolescence Education Prog-ramme kalpui a nih theih nan ruahmanna siam a ni bawk.

Adolescence Education Programme (AEP) hi sawrkar laipui Ministry of Human Resource Development (MHRD), Govt. of India chuan kum 2005 khan a kalpui tan a. Mizoram-ah chuan SCERT kaltlangin State AIDS Control Society te nena thawkhoin he programme hi kalpui a ni a. AEP thil tum zingah zirlai tleirawl leh rawlthar ten rilru hrisel an neih theihna tura an kum leh rilru puthmang mila kaihhruai te, an nuna thil thleng an hmachhawn theihna tura thiam pek te a tel a ni.