Mizoram Adventure Festival 2025 neih a ni

Tun thla ni 17 atanga 21 chhung khan ‘Mizoram Adventure Festival 2025’ chu neih niin Sports & Youth Services Department hnuaia in register Adventure Club hrang hrang atangin member 91 lai an tel a ni.

Sports & Youth Services Department buatsaih Mizoram Adventure Festival 2025 hi March 17 zan khan State Adventure Training Centre, Vaipuanpho-ah a hawnna neiin Festival chhung hian participants te Group thum-ah inthenin, Group tin te hian March 18 atanga 20, 2025 chhung khan hmun hrang hrangah Adventure Sports chi hran theuh an in tih chhawk a, chungte chu - Reiek tlang-ah Rappelling; Khuangchera puk-ah Caving; Trekking (Reiek to Ailawng), Tlawng Sihhmui kaiah Water Rafting leh SATC, Vaipuanpho-ah Army & High Rope Obstacle Course leh Ziplining te a ni a. Festival chhung hian participants te SATC Vaipuanpho-ah an riaklut vek a, March 21, 2025 zan-ah a kharna hun hman a ni.

Mizoram Adventure Festival 2025 buatsaih nan hian North Eastern Council atangin sum hmuh a ni a, ‘Choose Adventure, Choose Life’ tih chu thupui atan hman a ni.