Chief Minister hovin Chapchar Kut thlirlet

Chapchar Kut Organising Committee chuan kumin-a Chapchar Kut hman zawh tak chu an Chairman leh Chief Minister Lalduhoma hovin nimin khan an thlirlet.

Kumin-a Chapchar Kut hmanna atan hian budget cheng nuai 149.70 budget siam niin cheng nuai 149.60 vel senral a ni a, sum hmuhna lam hi sawrkarin Kut hmanna tur atan budget-ah cheng nuai 100 a dahsa a, sponsor atangin cheng nuai 35.91 vel hmuh a ni a, nikum balance tlema zawng la awm te nen leiba leh sum chuang bang nei lovin an inchingfel thei a ni.

Kumin hian Aizawl-ah Chapchar Kut pualin Photo & Painting Competition te, Flower Show te, Handloom Expo te leh Food Court te buatsaih ni bawkin Kut chhimtu mipui pawh an tha tih he hunah hian tarlan a ni a, Chapchar Kut Post Souvenir hi kum dang ang bawkin Information & Public Relations Department bultumin buatsaih zui leh nghal a ni a. April thla tawp lamah release theih beisei a ni.

He thutkhawm ah hian Chief Minister Lalduhoma chuan Chapchar Kut hlawhtling tak an buatsaih avangin Organising Committee te chungah lawmthu a sawi a. A thlirletna hunah hian Kut kan hman leh hunah nuam leh hlawh-tling zawka kan buatsaih theih dan tur thlir phaka ngaihtuahna sen a that thu sawiin, “Kut hi kan la hman zel hmel avangin hmasawn zel kan tum tur a ni,” a ti. Nakum lamah chuan District te hnena Kut hmanna tur sum an pek thin pawh tihpun deuh dan dap thaa a hriat thu a sawi a ni.

Kut thlengtu Art & Culture Minister C. Lalsawivunga pawhin Chapchar Kut 2025 chu Kut nuam, hlawhtling leh hriatrengtlak nia a hriat thu a sawi a. Aizawl leh district hrang hranga Kut hlawhtling taka buatsaihtu leh mawhphurtute zawng zawng chungah lawmthu a sawi a. He hunah hian Report hrang hrang ngaihthlak a ni bawk.