Mizo nula hnamdang pasal nei te huam lo tih sawi

Mizo Inneih, Inthen leh Rokhawmna Dan ennawntu Committee Chairman Zahmingthanga Ralte chuan tunlaiah Mizo nula hnamdang (Foreigner) pasal nei eng emawzat Kohhran-in a lo Inkutsuih tir tih sawiin, heng te hi Mizo Inneih Inthenna leh Rokhawmna dan, 2014 in a huam loh thu a sawi.

Tunkar Ningani khan Mizo Inneih, Inthen leh Rokhawmna Dan ennawntu Committee hi an Chairman leh Law & Judicial Department-a Addl. Secretary Zahmingthanga Ralte hovin Secretariat Conference Hall-ah an thukhawm a. Kan Inneih, Inthen leh Rokhawm chungchangah kum 2014-a Mizoram Legislative Assembly-in Dan a pass chauh chu hman tawh tur a ni tih sawiin, nupui pasal inthen tur reng rengin Mizo-in Inthen Dan kawng kan neih: Mak, Sumchhuah leh a dang te la hmang tho in Court hnai berah Inthenna lehkha lak tur a nih thu lehchung inthen dilna te chu Court-in thla ruk (6) chhungin a chingfel dawn tih a sawi a ni.

He Committee Chairman Zahmingthanga Ralte chuan tunlaiah Mizo nulate hnamdang (Foreigner) pasal nei engemaw zat Kohhran-in a lo Inkutsuih tir te an awm thu sawiin, “Hengte hian Mizo Inneih, Inthenna leh Rokhawmna dan, 2014 hnuaiah Inneihna an kalpui thei lovin, Dan chuan a huam lo,” a ti a. Mizoram-a Inneihna zawng zawng chu Supreme Court thupek angin Law &Judicial Department chuan Veng tin leh Khaw tina Registrar of Marriages kaltlangin a chhin chhiah vek thu leh Marriage Registration Certificate an pek thin thu a sawi a. He Certificate hi India Sawrkar leh ramdang Sawrkar pawhin an pawm a nih avangin fimkhur taka kalpui a tul thu a sawi a. Kan Mizo hmeichhia ten ramdanga harsatna an tawh palh loh nan Inneih sawngbawl leh a Dan hman tur thuah fimkhur taka ngaihtuahna hman a tul thu a sawi bawk a ni.