Mizo infiammi tithate lawmpuina thilpek hlan an ni

Tunhnaia India ram pum huap leh khawvel pum huapa Mizoram aiawha infiammi titha zualte hnena lawmpuina thilpek hlanna hun chu nimin khan Sports &Youth Affairs changtu Minister Lalnghinglova Hmar hovin hman a ni.

Sports Minister Pisa-a infiammi te lawmpuina hunah hian Sports Minister leh Mizoram State Sports Council (MSSC) Chairman Lalnghinglova Hmar chuan Mizoram sawrkar chuan rilru-a kum 2036 Olympic nei reng chungin Mizorama infiamna leh Infiammite chu a vil zui zel dawn tih a sawi a. Mizote chu infiamna lamah chuan hmasawn hlein inhre tawh mah ila, hnam anga kan tih theih zualna lai zawn thiam leh tih tak zetna kan neih a pawimawh tih sawiin, Sports Policy thar pawh sawrkar chuan duangin Cabinet pawhin a pawm tawh thu a sawi a. Infiammite chu tun aia Medal tam zawk Mizoram tana hawn theih tura inbuatsaih tura fuihin, Department pawhin theihtawp chhuaha thingtlang lam thlenga Infiammite zawnchhuah kawnga tan a lak tur thu a sawi bawk.

India rampum huap leh khawvel huapa Mizoram aiawha infiammi titha zualte hnenah lawmpuina hun hi Mizoram State Sports Council (MSSC) Secretary Henry C. Lalrawnkima chuan kaihruaiin infiammi 16 te hnenah lawmpuina hi hlan a ni a. 38th National Games neih zawh taka Gold Medal latu mi pathum leh Bronze Medal latu mi pakhat bakah Coach mi 3 te chu lawmpuina thilpek hlan an ni a. 67th National Shooting, Championship-a Gold Medal latu mi pakhat bakah World Arm Wrestling Championship, 2025-a Silver Medal latu mi pakhat te hnenah lawmpuina hi hlanin 14th National Senior, (Open) Classic, Powerlifting Championship 2025-a Medal latu mi 7 te hnenah lawmpuina hlan a ni bawk.