Laifate Kut ngaihlut ber, Hlukhla Kut hmang tan

Laifate Kut ngaihlut ber, Hlukhla chu nimin khan Lawngtlai-a Central YLA Playground-ah hman tan a ni. Nimin-a Hlukhla ni khatna ah Kut thlengtu LADC-a Executive Secretary K. Lalthanzara chuan hlim taka kut hmang tura mipuite sawmin pi leh pu hun a Hlukhla Kut hman thin dan tlangpui a sawi a. Kut Pa, Lai Autonomous District Council a Chief Executive Member V. Zirsanga chuan ram mipuite Hlukhla Kut chibai bukin duksakna a hlan a, hnam ziarang a bo loh nan Hlukhla Kut chawinun zel chu LADC Sawrkar pawhin a ngaih pawimawh thu sawiin, Laifate nun zemawi chu Kristianna nen inhnerem tak, hnam ziarang humhimna pawimawh tak a nih thu a sawi bawk.

Hlukhla Kut-ah hian rampum huapa zaithiam lar leh tualchhung zaithiamte an zai a, ram tana hnathawk tha te chawimawina hlan niin, Hnam lam hrang hrang entir a nih bakah Hnam infiamnate pawh neih tura ruahman a ni.