Sawrkar damdawi In tha leh felfai inelna - Kayakalp-a tithate hnenah lawmman semna hun hman a ni
Kum 2023-2024 leh 2024-2025 chhunga Mizoram-a Sawrkar Damdawi In tha leh felfai inelna – Kayakalp a tithate hnenah lawmman semna hun chu nimin khan neih niin Health Minister Lalrinpuii chuan khuallian niin a hmanpui a, he hunah hian Damdawi In fai lawmman thahnem tak semchhuah a ni.
National Health Mission (NHM) buatsaiha Kayakalp-a tithate hnenah lawmman semna hun Cultural Centre-cum-Auditorium, Vaivakawn-a neih ah hian Health Minister Lalrinpuii chuan Kayakalp-in a tum ber chu faina a nih thu sawiin, Mizoram chhunga damdawi In hrang hrang, Sub-Centre atanga PHC, District Hospital thleng a tlawh hnem tawh thu a sawi a. Heng ah hian Kayakalp hi a hlawhtling hle-a a hriat thu sawiin, District Hospital atanga Sub-Centre Level thlengin Medicinal Plants garden neih tur a nih chungchangah mipuite tana a tak taka a tangkai zawk theihnan Ayush Directorate lam nen pawha Convergence tha zawk awm thei se a duh thu a sawi a. Kayakalp lawmman dawng zawng zawngte a lawmpui thu sawiin, lawmman dawng ve ta rih lo damdawi In an la awm a nih chuan nasa lehzuala tan la turin a chah bawk.
Health Minister chuan NQAS leh Kayakalp Checklist te tha taka an hlen chhuah hian an service pawh quality zawk leh tha sawt tur a beisei an nih thu sawiin, “Heng zawng zawng kan tih chhan ber mipui leh damlo te kan enkawlna kawngah hmasawnna a awm ve si loh chuan awmzia a nei dawn lo a ni,” a ti a. Kayakalp leh NQAS laimu ber te zinga mi chu ‘Hawihhawmna’ a nih vangin damlo damdawi In rawn pantu te reng reng hawihhawm leh rang taka lo buaipui zung zung tur leh enkawlna dik an mamawh ngei an dawn theihna tur a hma la thin turin a chah a ni.
‘Kayakalp’ ah hian endikna tur duansa (checklist) hmangin chhawng thuma endik a ni a, damdawi In leh a chhehvel an enkawl danah te, damdawi In atanga bawlhhlawh chhuak thliar-hrana natna hrik inkaidarh lohna tura sawngbawl hnua a paihna hmun dik taka paih a nih dan te, thawktute’n an hna bil theuh an thiam dan te, damlo te ngaihdan lakna (patient satisfaction survey) te, khawtlang nena faina kawnga an thawh-hona te leh eco-friendly lama an hmalakna te chu endikna zingah hian a tel a ni.
Sawrkar kum 2023-2024 leh 2024-2025 lawmman dawng tura thlan te hnenah lawmman hi sem niin District Hospital fai lawmman chu kum 2023-24 ah Champhai in pakhatna dawngin Saiha leh Saitual District ten an dawt a. Kum 2024-25 ah Saitual in lawmman pakhatna dawngin Saiha leh Champhai District ten an dawt bawk.
District Hospital Eco-Friendly Award chu kum 2023-24 ah Siaha in lawmman pakhatna dawngin Champhai in pahnihna an dawng a, kum 2024-25 ah Civil Hospital Lunglei in lawmman pakhatna dawngin Saitual in pahnihna an dawng bawk a. Special Award chu Civil Hospital Aizawl, Civil Hospital Lunglei leh State Referral Hospital, Falkawn ten dawngin Best Teamwork lawmman chu Khawzawl in an dawng bawk.
Sub-District Hospital (SDH) leh Community Health Centre (CHC) te zingah Thenzawl CHC chuan kum 2023-2024 leh 2024-2025 ah te lawmman pakhatna dawng ve ve in SDH/CHC Eco-Friendly Award-ah heng kum hnih ah te hian lawmman pahnihna an bawk a ni.
Primary Health Centre (PHC) ah District tan lawmman a hrana siam niin 2023-24 ah Serchhip District atangin East Lungdar PHC chu pakhatna niin North Vanlaiphai PHC leh Khawlailung PHC ten an dawt a. Kum 2024-25 ah North Vanlaiphai PHC chu pakhatna niin Ngentiang PHC leh Chhingchhip PHC ten an dawt bawk. Health & Wellness Centre-Sub-Centre (HWC-SC) ah kum 2023-24 ah Keitum chu pakhatna niin Sailulak chu pahnihna an ni a, kum 2024-25 ah Sailulak chu pakhatna niin Serchhip chu pahnihna an ni bawk.