MLA in thubuai a neih a la hriat loh thu a sawi

Lawngtlai West bialtu MLA C. Ngunlianchunga chuan Assembly Budget Session neih zawh takah Chief Minister-in Anticipatory bail la tura a tih chu a lak dawn loh thu leh thubuai a neih a la hriat loh thu a sawi.

Lawngtlai West Bialtu MLA C. Ngunlianchunga hian nimin khan Lai District Congress Committee buatsaihin Lawngtlai-a Areopagy-a vantlang inkhawm buatsaihah thu a sawi a, he hunah hian Ngunlianchunga chuan Lai Autonomous District Council-a Chief Executive Member a nih laiin Lawngtlai khawpui helna tur kawngpui sial a nih theihna tura bultan a nih thu a sawi a, Lawngtlai West bial-ah MLA atan thlantlin a nih vangin Lawngtlai By-Pass Road chu a khawih zui loh thu a sawi bawk a. Minister a nih hnuah a ram neitute chu an ram a tihchhiat turah zangnadawmna pek theih a nih loh vanga tlawmngaih chhuah tura ngenna ah erawh theihtawp a chhuah thu a sawi bawk a ni.

Assembly Session-ah Chief Minister-in thubuai a neih thu a sawi chu a vawi khat hriatna a nih thu leh Vawiin thlengin ACB atangin emaw, hmundang atangin emaw thubuai a neih thu a la hriat loh thu Ngunlianchunga chuan a sawi a, a chungah eng pawh thleng se Anticipatory Bail lak a tum loh thu leh lung In tan ngai a nih pawhin dikna humhim turin a thisen far tawp thlenga a beih tur thu a sawi a ni.