Lawngtlai-a SPIO leh SAPIO ten RTI an zirho

Mizoram Information Commission-a Chief Information Commissioner John Neihalai leh Secretary H. Dolianbuaia te chuan nimin khan Lawngtlai District-a State Public Information Officer (SPIO) leh State Assistant Public Information Officer (SAPIO) te RTI Act chungchang zirhona an neihpui. He hunah hian John Neihlaia chuan mi thahnemngaite thawhrimna zarah RTI Act chu October 12, 2005 atang khan India ramah hman tan niin, Mizoram-ah chuan RTI Act kalpui turin June 2006 khan Mizoram Information Commission din a nih thu a sawi a. Dan tha tak siam tura theihtawp chhuahtute an fak awm takzet a ni, tiin RTI Act chu ngaihlu leh ngaipawimawh turin kalkhawmte a chah a. Mizoram-ah RTI Online a kalpui a nih atangin zawhna a lut tam em em a, kumin bikah zawhna 1107 lai a lut tawh tih a tarlang a. Zawhna a tam zel avangin SPIO leh SAPIO ten theithawp chhuah zel a tul thu a sawi bawk.