Lamsial Puk hmuchhuaktu hriatrengna lung phun

Champhai District-a Farkawn ram chhunga awm, Lamsial Puk-a ruhrote hmuchhuaktu Taisanga hriatrengna lung chu Inrinni khan phun a ni.

    Lamsial Puk hi kum 1951 vel khan Taisanga ram vakin hmuchhuakin Lamsial ram-a lo awm a nih avangin ‘Lamsial Puk’ tih zui a ni a, a hmu-chhuaktu Taisanga hi kum 1921-ah Farkawn-ah a piang a, January ni 23, 2011 khan Champhai Ruantlang-ah a boral a ni. Lamsial Puk-ah hian Lu ruh, khabe ruh, ngal ruh, ban ruh leh ruh dang engemaw zat a awm a. Heng ruhrote hi kum 1976 khan Archaelogical Institute, Mumbai-ah exam tura thawn a ni a. AIM in an lo endik atanga a landanin Lamsial Puk a ruhro awmte hi AD 1650 vela mi nia hriat a ni a. Helai velah hian tunhma in Lamsial hnam an lo cheng tawh thin a ni. Lamsial Puka ruhro awmte hi darthlalang bawmah dah that niin kumtin zirlai, Adventure Club, mimal leh pawl hrang hrang bakah ramchhung hmun dang atangtein an tlawh nasa thei hle a, Farkawn Heritage Preservation Society te chuan uluk takin an enkawl mek a ni.