SYS leh END Minister in Champhai a tlawh

Sports Minister Lalnghinglova Hmar chuan Champhai tlawhin Inrinni khan Vanlallawma Indoor Stadium (VANIS) leh Keilungliah tuikhuah a tlawh a, a Department chan Excise & Narcotics Department thawktute nen an inkawm bawk.

Vanlallawma Indoor Stadium-a tlawhnaah hian Sports Minister hi District Sports & Youth Office a thawktute leh Champhai District Basketball Association hruaitu ten an lo dawngsawng a. Champhai khawpuiin Mizoram Super League (MSL) a thlen tuma Basketball Backboard chhia chu a rang lama thlak sak tum a nih thu a sawi a ni. Minister hian Keilungliah tuikhuah tlawhin, khualzinmite hip theihna tura hmun tha leh khawtual mi te tan pawha eizawnna tling siam thei ni a hriat thu a sawi a. He hmun chei tura hmalakna pawh thui tak kalpui tawh niin, hna tan theih hun pawh hla lutuk tawh lo tura a beisei thu a sawi bawk.

Excise & Narcotics Minister Lalnghinglova Hmar hian Champhai-a END hotute pawh a kawm nghal a. Assistant Commissioner C. Thangchuanga leh OC Lalhmingthanga te nen Champhai-a Excise & Narcotics Department mamawh leh hmalak dan turte sawiin, inkawmna hun tha tak an nei a ni.