Kum khat chhungin lirthei dan bawhchhia 10,211 man

Nikum 2024 chhung khan Aizawl khawpui chhungah lirthei dan bawhchhia 10,211 man an awm a, an pawisa chawi tlingkhawm chu Rs. 73,10,602 a tling.

Lirthei dan bawhchhiatna thleng zingah lirthei hun/dah phal lohnaa dah (parking violation) a tam ber. Aizawl Traffic Police hotute sawi danin, nikum chhunga lirthei dan bawhchhia 10,211 manin heng an man zinga a tam ber chu Two Wheeler niin 7,252 zet a tling a, LMV 2,104 man bawkin, Taxi 403 man an awm bawk a, hengte hi dan bawhchhia man tam zualte an ni.

Dan bawhchhiatna hrang hrang zingah phal lohna hmuna lirthei dah chu dan bawh-chhiatna tam ber niin 2,359 man an awm a, No Entry zawm lo 752 man awm bawkin, Wrong Side traffic 564 man an awm a. No Turning zawm lo 524 man awm bawkin, Obstruct Traffic flow 349, Helmet khum lo 242, Disobey Signal/order 153, Driving License nei lo 218 leh zurui chunga lirthei khalh 79 man an awm bawk.

Nikum 2024 chhung khan Aizawl khawpui chhung-ah lirthei chetsualna thleng a nunna chan mi 87 awmin, inhliam mi 100 an awm nia chhin-chhiah a ni bawk a. Data atanga a lan danin, nikum chhung khan July thla-ah dan bawhchhia lirthei man an tam ber a, Traffic Police te man zawng zawng 1,131 tlingin, an pawisa chawi pawh Rs. 7,86,700 a tling a. June thla-ah dan bawh-chhia lirthei man tlem ber thungin lirthei 708 man an awm a, an pawisa chawi tlingkhawm pawh Rs. 5,00,800 a tling a ni.

Aizawl Traffic : Dan bawhchhia

Kum Man zat   Chawi zat

2020 11,092 Rs. 43,82,250

2021 10,027 Rs. 34,03,100

2022 18,359 Rs. 82,61,600

2023 14,683 Rs. 1,05,46,412

2024 10,211 Rs. 73,10,602