Chief Minister hovin Chapchar Kut hman a ni

Mizote Kut pui leh ngaihhlut ber Charchar Kut chu nimin khan Mizoram hmun hrang hrang bakah State pawna Mizoram House-ah te hman a ni a. Kumin Chapchar Kut Thupui atan ‘Zonun Zemawi Hawihhawmna’ tih hman a ni.

Chapchar Kut lawmna pui ber hi Aizawl-a Sipai Lammual-ah neih niin Kut Pa Chief Minister Lalduhoma chuan Mizo pi leh pu te kha mi hawihhawm, aia upa zah leh piangsual hmusit ngai lo an ni, a ti a, chumi te thlah chu kan nih avangin tunlai thangthar te pawh Social Media hrang hrangah te tawngkam hawihhawm hmang turin a chah a ni. Chief Minister Lalduhawma chuan, Zofa hmun hrang hranga awmte chu taihmak chhuah lehzual theuh turin a chah a, sawrkar hnathawk zawng zawng pawhin rim takin hna a thawk mek tih a sawi a. Zofa zawng zawng ten an eizawnna theuhah, tih takzet an chhuah theuh chuan he hnam hi a ropui ang, tiin hnam ropuina tur chu taihmak a nih thu a sawi.

Chief Minister chuan Mizo pui leh pute chu aia upa zah mi an nihna chu an hawihawmna mawi tak a ni tih a sawi a, tunlaiah Office hna thawhna ah kum naupang zawkte chu hna sang thawk tam tak an awm tawh avangin hmanlai nun ang zawng zawng chu chhawm a rem lohna chen a awm tih a sawi a, chutihrualin a theihna chen chenah aia upa zahna chu lantir a pawimawh tih a sawi bawk.

Lammual-a hun hmanah hian hnam zia chi hrang hrang tarlan a ni a, Cheraw kan a nih bakah Hlado chham niin - Hnam Lam,Pipu zai, Lemchan, Sechhun Khuangchawi, Pawnto leh Chhawnghnawh te bakah hun hlimawm hrang hrang hman a ni. Chapchar Kut hi mi zawng zawngin an hman theih nan, Mizoram sawrkar chuan nimin kha pisa chawlh atan a puang a, tunkar chhung khan sawrkar hnathawkte chu an hna-thawhna hmunah hnam thuam inbel turin a lo ti tawh bawk a, hei hian ngaihhlut a hlawh hle a ni.